شىمكەنت قالاسىنىڭ پوليسيا دەپارتامەنتى جەرگىلىكتى پوليسيا قىزمەتى باسقارماسىنىڭ باستىعى بولىپ ۇلىقبەك مىلتىقوۆ تاعايىندالدى. بۇل تۋرالى قالالىق پوليسيا دەپارتامەنتىنىڭ باسپا ءسوز قىزمەتى حابارلادى.
"ىشكى ىستەر ءمينيسترى ەرلان تۇرعىمبايەۆتىڭ كەلىسىمى بويىنشا شىمكەنت قالاسى پوليسيا دەپارتامەنتىنىڭ باستىعى، پوليسيا گەنەرال-مايورى قايرات دالبەكوۆتىڭ بۇيرىعىمەن جەرگىلىكتى پوليسيا قىزمەتى باسقارماسىنىڭ باستىعى لاۋازىمىنا پوليسيا پولكوۆنيگى مىلتىقوۆ ۇلىقبەك تۇرعۇن ۇلى تاعايىندالدى" دەلىنگەن حابارلامادا.
مىلتىقوۆ اتالعان لاۋازىمعا سىبايلاس جەمقورلىق داۋىنان كەيىن قىزمەتىنەن بوساتىلعان مۇحتار بۇحاربايەۆتىڭ ورنىنا كەلگەن. سوڭعىسىن قول استىنداعىلاردىڭ ءبىرى قىمبات زاتتاردى ساتىپ الۋعا "ماجبۇرلەدى" دەپ ايىپتاپ، دالەل رەتىندە ءتيىستى حات-حابارلاردىڭ سكرينشوتتارىن كەلتىرگەن.
ۇلىقبەك مىلتىقوۆ 1975 جىلى شىمكەنت قالاسىندا دۇنيەگە كەلگەن. ىشكى ىستەر ورگاندارىندا 1996 جىلدان باستاپ قىزمەت ەتەدى. ورتا جانە اعا باسشى قۇرامنىڭ ءارتۇرلى لاۋازىمدارىندا قىزمەت اتقارعان.
ول 2011 جىلعى جاڭاوزەن وقيعاسى كەزىندە ماڭعىستاۋ وبلىسى ىشكى ىستەر دەپارتامەنتى قوعامدىق قاۋىپسىزدىك باسقارماسىنىڭ باستىعى قىزمەتىن اتقارعان.
جاڭاوزەندەگى تارتىپسىزدىكتەر كەزىندە ول ەكى ءىس بويىنشا فيگۋرانت بولعان. بىرىندە جابىرلەنۋشى رەتىندە، ەكىنشىسىندە بەيبىت دەمونسترانتتاردى اتۋ فاكتىسىندە كۋاگەر اتانعان. سول كەزدە مىلتىقوۆ بەيبىت تۇرعىنداردى اتۋعا بۇيرىق بەرمەگەنىن مالىمدەگەن.
ماڭعىستاۋ وبلىسى جاڭاوزەن قالاسىندا جالاقى ماسەلەسىن ايتىپ، جەتى اي بويى الاڭدا نارازىلىق بىلدىرگەن مۇنايشىلارعا 2011 جىلعى 16 جەلتوقساندا پوليسيا وق اتىپ، ەرەۋىلدى كۇشپەن باسقان. سونىڭ سالدارىنان 17 ادام قازا تاۋىپ، 100-دەن استام ادام جارالانعان.
جاڭاوزەن ءىسى بويىنشا جۇرگەن سوت پروسەستەرىنىڭ ناتيجەسى بويىنشا مۇنايشىلارعا وق اتقانى ءۇشىن 5 پوليسەي 5 جىلدان 7 جىلعا دەيىن سوتتالعان. سونداي-اق 37 ادامعا "جاپپاي تارتىپسىزدىك ۇيىمداستىرۋ" ايىبى تاعىلىپ، ولاردىڭ 13ء-ى ءۇش پەن جەتى جىل ارالىعىنداعى مەرزىمگە سوتتالعان. 21 ادامعا شارتتى جازا كەسىلسە، 3-ەۋ اقتالعانىپ شىققان.
پىكىر قالدىرۋ