باس پروكۋراتۋراعا قاراستى ارنايى پروكۋرورلار قىزمەتىنىڭ باسشىسى ريزابەك وجاروۆ "كازاحستانسكايا پراۆدا" باسىلىمىنا بەرگەن سۇحباتىندا ۋاقىتشا ۇستاۋ يزولياتورلارىندا ازاپتاۋ فاكتىلەرىنىڭ سالدارىنان 6 ادام مەرت بولعانىن ءمالىم ەتتى.
ونىڭ ايتۋىنشا، ازاپتاۋ فاكتىلەرىن جەمقورلىققا قارسى قىزمەت ماماندارى تەرگەيدى. ال ارنايى پروكۋرورلار قىزمەتىنە ادام ءولىمى سەكىلدى اۋىر سالدارعا سوقتىرعان ازاپتاۋ فاكتىلەرى تۋرالى ىستەر كەلىپ تۇسەدى.
– بىزدەگى مالىمەتكە ساي، وسىنداي جاعداي (ازاپتاۋ – رەد) كەزىندە الماتىداعى ۋاقىتشا ۇستاۋ يزولياتورىندا ەكى ادام قازا تاپقان، ءۇش ادام – شىعىس قازاقستان وبلىسىندا، ءبىر ادام تالقىقورعاندا مەرت بولعان. بۇدان بولەك تالدىقورعان تۇرعىنىن ۇتىكپەن ازاپتاۋعا بايلانىستى رەزونانس تۋدىرعان ءىستى دە قاراۋىمىزعا الدىق. بۇل دەرەك بويىنشا تەرگەۋ جالعاسىپ جاتىر، ونىڭ ناتيجەسى تۋرالى مىندەتتى تۇردە حابارلانادى. ءبىراق مۇنداي قىلمىستار جاپپاي سيپات الماعان اتاپ وتكىم كەلەدى، – دەيدى ول.
قاڭتار وقيعاسىنان كەيىن ۇستالعاندار پوليسيا بولىمشەلەرىندە، تەرگەۋ يزولياتورلارىندا ازاپتاۋعا ۇشىراعانى تۋرالى كوپتەگەن فاكتىلەر بەلگىلى. كەي جەردەردە پوليسيا قىزمەتكەرلەرى ۇستالعانداردى ۇرىپ سوعۋدان بولەك، ۇتىكپەن كۇيدىرگەن، تىرناق استىنا ينە سۇققان، تىستەن توق سوققان، كۇدىكتىلەردىڭ ۇستىنە قايناعان سۋ قۇيعان، باسىنا سەللوفان كيگىزىپ تۇنشىقتىرعان.
بۇعان دەيىن ازاپتاۋ مەن زاڭسىز تەرگەۋ ادىستەرىنە بايلانىستى 178 قىلمىستىق ءىس قوزعالعانى حابارلانعان.
پىكىر قالدىرۋ