رەسەي پرەزيدەنتى ۆلاديمير پۋتين ۋكراينانىڭ شىعىسىنداعى دونباسس ايماعىن قورعايمىز دەگەن جەلەۋمەن ارنايى اسكەري وپەراسيا باستايتىنىن ءمالىم ەتتى.
"رەسەي ۋكراينادا يادرولىق قارۋ بار ەكەنىن جوققا شىعارمايدى. رەسەي ۋكراينا ايماعىن باسىپ الۋدى جوسپارلاپ وتىرعان جوق. جاعداي شەشۋشى ارەكەتتەردى تالاپ ەتەدى. ۋكرايناداعى بارلىق حالىق ەگەمەن بولۋعا دەگەن قۇقىعىن قولدانۋى ماڭىزدى. ىقتيمالدى قانتوگىس تولىقتاي ۋكراين رەجيمىنىڭ موينىندا بولادى" دەپ كەلتىردى ءپۋتيننىڭ سوزدەرىن تاسس اگەنتتىگى.
"تاسس" ۋكراينانىڭ كييەۆ، حاركوۆ قالالارىنىڭ ماڭىندا اتىس داۋسى ەستىلىپ جاتقانىن ءمالىم ەتتى.
بۇعان دەيىن رەسەي پرەزيدەنتى دونباسستاعى وزدەرىن تاۋەلسىز دەپ جاريالاعان "دونەسك حالىقتىق رەسپۋبليكاسى" مەن "لۋگانسك حالىقتىق رەسپۋبليكاسىنىڭ" ەگەمەندىگى مەن تاۋەلسىزدىگىن مويىنداۋ تۋرالى جارلىققا قول قويعان.
"دونەسك حالىقتىق رەسپۋبليكاسى" مەن "لۋگانسك حالىقتىق رەسپۋبليكاسى" – ۋكراينانىڭ شىعىسىندا ورنالاسقان دونباسس ايماعىنا كىرەتىن دونەسك جانە لۋگانسك وبلىستارى اۋماعىندا ءوزىن تاۋەلسىز دەپ جاريالاعان سەپاراتيستىك مەملەكەت. 2014 جىلى ۋكرايناداعى ساياسي داعدارىس بارىسىندا جاڭا ۇكىمەتكە قارسىلىق رەتىندە پايدا بولعان. تاۋەلسىزدىكتەرىن 2014 جىلعى 12 مامىردا جاريالاعان. سودان بەرى كەشەگى كۇنگە دەيىن ولاردىڭ تاۋەلسىزدىگىن ءىشىنارا تاۋەلسىز دەپ تانىلعان وڭتۇستىك وسەتيا رەسپۋبليكاسى عانا مويىنداعان. بىرىككەن ۇلتتار ۇيىمى، ەۋرو وداق، ەۋروپا قاۋىپسىزدىك جانە ىنتىماقتاستىق ۇيىمى سەكىلدى حالىقارالىق بەدەلدى ۇيىمداردىڭ ەشبىرى سەپاراتيستىك رەسپۋبليكالاردىڭ تاۋەلسىزدىگىن مويىنداماعان.
ۋكراينا بيلىگى سەپاراتيستىك مەملەكەتتەردى رەسەي فەدەراسياسى باسىپ العان دونەسك جانە لۋگانسك وبلىستارىنىڭ ءبىر بولىگى دەپ تانيدى. رەسەي بولسا، دونباسستاعى قارۋلى قاقتىعىسقا قاتىسى بارىن جوققا شىعارادى. ۋكراينا كونستيتۋسياسىنا ساي، "دحر" مەن "لحر" يەلىك ەتەتىن اۋماق ۋكراينانىڭ مەملەكەتتىك ەگەمەندىگى ارەكەت ەتەتىن ايماق بولىپ سانالادى. قازىرگى ۋاقىتتا سەپاراتيستىك رەسپۋبليكالار بۇرىنعى دونەسك پەن لۋگانسك وبلىستارى اۋماعىنىڭ ۇشتەن ءبىر بولىگىن باقىلايدى. وزدەرى ەكى وبلىس اۋماعىنا تۇتاس يەلىك ەتەمىز دەپ ەسەپتەيدى. قوس رەسپۋبليكا دا ۋكراينادا تەرروريستىك دەپ تانىلعان.
پىكىر قالدىرۋ