سەنات ءتوراعاسى ماۋلەن اشىمبايەۆ ۋكرايناداعى وقيعالارعا قاتىستى پىكىر ءبىلدىردى. ول شيەلەنىستى كەلىسسوزدەر ارقىلى بەيبىت جولمەن شەشۋ ماڭىزدى ەكەنىن ايتتى.
– ءبىز جاعدايدىڭ ۋشىعىپ، جاڭا كەزەڭگە شىققانىن كورىپ وتىرمىز. اقپارات كەلىپ جاتىر، وعان سايكەس جاعداي شيەلەنىستىڭ جاڭا دەڭگەيىنە كوتەرىلدى دەۋگە بولادى. بۇل جاعدايدا كەلىسسوزدەر ارقىلى وسى قاقتىعىستىڭ ساياسي بەيبىت شەشىمىن ىزدەۋ وتە ماڭىزدى. بارلىق مۇددەلى تاراپ شاقىرىلعان كەلىسسوز. كەلىسسوزدەر بارىسىندا بارلىق قاتىسۋشى تاراپ مۇددەلەرى ەسكەرىلۋى كەرەك جانە بۇۇ شەڭبەرىندەگى كەلىسسوزدەر ءتيىمدى بولار ەدى، – دەدى سەنات ءتوراعاسى.
اشىمبايەۆ سونداي-اق قازاقستان ۇجىمدىق قاۋىپسىزدىك تۋرالى شارت ۇيىمى اياسىندا قاقتىعىش وشاعىنا بىتىمگەرلىك كۇشتەردى جىبەرمەيتىنىن، تەك ۇيىمعا مۇشە ەلدەر اۋماعىنا جىبەرە الاتىنىن جەتكىزدى.
قازاقستاننىڭ سىرتقى ىستەر مينيسترلىگى ۋكرايناداعى سوڭعى وقيعالارعا بايلانىستى قازاقستان رەسپۋبليكاسىنىڭ كييەۆتەگى ەلشىلىگى ازاماتتارىمىزدى ەۆاكۋاسيالاۋدى قامتاماسىز ەتىپ جاتقانىن مالىمدەدى.
بۇعان دەيىن رەسەي پرەزيدەنتى ۆلاديمير پۋتين ۋكراينانىڭ شىعىسىنداعى دونباسس ايماعىن قورعايمىز دەگەن جەلەۋمەن ارنايى اسكەري وپەراسيا باستايتىنىن مالىمدەگەن.
پىكىر قالدىرۋ