قازاقستاننىڭ ەكس-پرەزيدەنتى نۇرسۇلتان نازاربايەۆ قاڭتار وقيعاسىنا دەيىن جانە ودان كەيىن قايدا بولعانى انىقتالدى. بۇل تۋرالى قازتاگ رەداكسياسى حابارلادى.

اگەنتتىك تاراتقان اقپاراتقا سۇيەنسەك، نازاربايەۆ 2022 جىلعى 3 قاڭتارعا دەيىن الماتى وبلىسىندا بولعان.

"ءوزىنىڭ تۋعان اۋىلىندا، جامبىل جانە قاراساي اۋداندارىنداعى تۇراقتى دەمالىس ورىندارىندا بولدى. الماتىداعى وقيعالار جاپپاي سيپات الا باستاعاندا، ونى قاڭتاردىڭ 4 كۇنى تۇندە دۋلاتي كوشەسىندەگى (بۇرىنعى ناۋاي كوشەسى) جەكە رەزيدەنسياسىنان ەشكىمنىڭ نازارىن اۋدارماس ءۇشىن قوسالقى جولدار ارقىلى اۋەجايعا اپاردى. بۇعان مەملەكەتتىك كۇزەت قىزمەتكەرلەرى مەن الماتى قالالىق جول پوليسياسى ارنايى باتالونىنىڭ شەكتەۋلى سانى كۋا" دەلىنگەن اگەنتتىك دەرەككوزىندە.

ارتىنشا ەكس-پرەزيدەنت اقمولا وبلىسىندا جۇرگەن.

"پرەزيدەنت قاسىم-جومارت توقايەۆ 4-5 اقپاندا وليمپياداعا ساپارى كەزىندە نازاربايەۆ بۋراباي كۋرورتىندا بولعان. ول ءوزىنىڭ رەزيدەنسياسىندا 5 كۇن دەمالدى. بۇل جولى ول كۋرورتقا اۆتوكولىكپەن بارعان، بۇرىن ول تىكۇشاقپەن كەلۋشى ەدى" دەلىنگەن حابارلامادا.

اگەنتتىك ادەتتە نازاربايەۆ بۋرابايعا كەلەردە وندا ۇزدىك كۇزەت توبى، بىرنەشە بروندالعان كولىك جانە سيگنالداردى سوندىرەتىن تەحنيكا بار ارنايى كاماز كەلەتىنىن جازدى. ءتىپتى ەكى اسكەري تىكۇشاق پەن جەدەل ارەكەت ەتۋ توبى كەزەكشىلىكتە تۇراتىن. الايدا بۇل جولى مۇنىڭ ەشقايسىسى بولماعان. سونداي-اق نازاربايەۆتىڭ كەيبىر كۇزەت وفيسەرلەرى اۋىسقان.

دەرەككوز نازاربايەۆ بۇعان دەيىن قازاقستان ۇكىمەتىنە تيەسىلى (تىركەۋ ءنومىرى UP-EC501) №1 Eurocopter EC 225LP Super Puma II + تىكۇشاعىن پايدالانعانىن اتاپ كورسەتەدى. ونىڭ ۇشىپ-قونۋى كەزىندە كەم دەگەندە ءبىر اسكەري تىكۇشاق قاتار جۇرگەن. دەرەككوز ونىڭ اۆتوكولىكپەن ءجۇرۋىن دەنساۋلىق جاعدايىمەن بايلانىستىرادى.

"پرەزيدەنت توقايەۆ قاڭتار ايىنا دەيىن رەسەيلىك مي-8 تىكۇشاعىمەن ۇشاتىن، بۇل ەۋروكوپتەردەن الدەقايدا ارزان" دەلىنگەن اگەنتتىك حابارلاماسىندا.

دەرەككوز اقپان ايىنىڭ باسىنا دەيىن نازاربايەۆ قازاقستاندا بولعانىن، قازىرگى ۋاقىتتا بىرىككەن اراب امىرلىگىندە ەكەنىن ايتادى.

"نازاربايەۆ ءقازىر كوروناۆيرۋس پاندەمياسى ءورشىپ تۇرعاندا 100 ميلليون دوللاردان استام اقشاعا ساتىپ الىنعان Airbus 320 NEO ۇشاعىمەن ساياحاتتاپ ءجۇر. نازاربايەۆتىڭ تمد ەلدەرى باسشىلارىنىڭ كەزدەسۋىنە ۇشقان Airbus A330 ءىرى ۇشاعى ەلوردالىق نۇرسۇلتان نازاربايەۆ اتىنداعى اۋەجايدىڭ انگارىندا تۇر" دەلىنگەن اقپاراتتا.