ءماجىلىس دەپۋتاتى داريعا نازاربايەۆا وكىلەتتىگىن توقتاتادى. بۇل تۋرالى Zakon.kz باسىلىمى حابارلادى.
"بۇگىن پارلامەنت ءماجىلىسىنىڭ دەپۋتاتى رەتىندەگى وكىلەتتىگىمدى توقتاتۋ تۋرالى شەشىم قابىلدادىم. ەندى ءوزىمدى تولىقتاي قوعامدىق، گۋمانيتارلىق، مادەني جانە قايىرىمدىلىق جۇمىستارعا ارنايمىن" دەيدى ول.
بۇعان دەيىن ءماجىلىس دەپۋتاتى ايدوس سارىم داريعا نازاربايەۆا وتستاۆكاعا ءوتىنىش جازۋى كەرەك دەگەن بولاتىن.
"قالىپتاسقان جاعدايعا بايلانىستى ادام رەتىندە، ازامات رەتىندە ول وتستاۆكاعا ءوتىنىش ءبىلدىرۋى كەرەك" دەگەن ول داريعا نازاربايەۆاعا سەنىمسىزدىك تانىتاتىنىن جەتكىزگەن.
داريعا نازاربايەۆا قاڭتارداعى حالىق نارازىلىعىنان بەرى ماجىلىستەگى جيىندارعا كەلگەن جوق. قاڭتاردىڭ باسىنان بەرى كوپشىلىك الدىنا دا شىقپادى. رەسمي اقپارات بويىنشا ول اقىسىز دەمالىستا بولدى. كوروناۆيرۋس جۇقتىرىپ، الماتىداعى ۇيىندە ەمدەلىپ جاتتى. بەيرەسمي اقپاراتتاردا ول دۋبايدا ەكەنى ايتىلادى. ول 28 قاڭتاردا NurOtan پارتياسى ساياسي كەڭەسى قۇرامىنان شىعارىلعان.
پىكىر قالدىرۋ