تىركەلمەگەن دەموكراتيالىق پارتيانىڭ جەتەكشىسى جانبولات ماماي اكىمشىلىك قاماۋعا الىنعاندارعا ارنالعان مەكەمەدە ەمەس، الماتى قالالىق پوليسيا دەپارتامەنتىنىڭ ۋاقىتشا ۇستاۋ يزولياتورىندا. بۇل تۋرالى ساياساتكەردىڭ ايەلى ينگا يمانباي الەۋمەتتىك جەلىدەگى پاراقشاسىندا مالىمدەدى. 

– 13 اقپاندا قاڭتارداعى قايعىلى وقيعادا قازا بولعانداردى ەسكە العان ميتينگىگە قاتىستى جانبولات مامايعا اكىمشىلىك كودەكستىڭ 488-باپ 7ء-بولىمى (بەيبىت جيىن ءتارتىبىن بۇزۋ) بويىنشا ايىپ تاعىلدى. وزدەرىڭىز بىلەسىزدەر ميتينگكە 1000-نان استام ادام قاتىستى. ءبىراق بىزگە جانبولات مامايدى جانە ونىڭ جاقتاستارىن نە ءۇشىن ۇستاعاندارىن تۇسىندىرمەدى. بۇل زاڭسىز، ورەسكەل ارەكەتتەر ءبىزدىڭ ومىرىمىزگە ءقاۋىپ ءتوندىرىپ تۇر، – دەيدى ي. يمانباي.

بەلسەندىنىڭ ايەلى ماماي جانە ونىڭ جاقتاستارىن پوليسيا بولىمىنە قالاي الىپ كەتكەندەرىن ايتىپ بەردى.

– ءبىزدى كولىكپەن بىرگە ەۆاكۋاتورمەن پوليسيا بولىمىنە الىپ كەتتى. ءبىزدى كىم جانە نە ءۇشىن الىپ بارا جاتقاندارىن تۇسىندىرمەستەن، پوليسيا بولىمىنە الىپ كەتتى. پوليسيا بولىمىنە كەلگەن سوڭ عانا بىزگە ناۋرىزباي اۋدانى پروكۋرورىنىڭ ورىنباسارى 13 اقپان كۇنى قاڭتار قۇرباندارىنا ارنالعان قارالى ميتينگ ءۇشىن جانبولات مامايعا قارسى اكىمشىلىك حاتتاما تولتىرىلعانىن ايتتى. ءبىز بۇگىنگە دەيىن ۇستاۋدىڭ ءتۇر-تۇرىن كوردىك. ءبىراق كولىكتى ەۆاكۋاتورمەن پوليسيا بولىمىنە جەتكىزۋ دەگەن ءبىرىنشى رەت، – دەپ اتاپ ءوتتى ول.

ينگا يمانباي قاماۋداعى بەلسەندى داۋرەن دوستياروۆ دەنساۋلىعىنا بايلانىستى 13 اقپانداعى ميتينگكە قاتىسپاعانىن جەتكىزدى.

– وزدەرىڭىز بىلەتىندەي، داۋرەن دوستياروۆ قاڭتار وقيعاسىنان كەيىن ءبىر اپتا بويى ازاپتالىپ، پوليسياعا قارسى قىلمىستىق ءىس قوزعالدى. ونى پوليسياعا باعىنباعانى ءۇشىن، بەس تاۋلىككە سوتتادى. كەلەسى كۇنى، سەنبى 26 قاڭتار كۇنى جانبولات مامايدىڭ تاعى ءبىر جاقتاسى رىسبەك توقتاسىندى ۇرىپ-سوعىپ، ونى ارنايى مەكەمەگە ەمەس الماتى قالالىق پوليسيا دەپارتامەنتىنىڭ ۋاقىتشا ۇستاۋ يزولياتورىندا 15 تاۋلىككە قاماۋعا الدى. مۇنىڭ ءبارى ەشنارسەنىڭ وزگەرمەگەنىن، قاڭتار تراگەدياسى ولارعا ساباق بولماعانىن كورسەتەدى، – دەدى ول.

سونداي-اق ساياساتكەردىڭ ايەلى مەن جاقتاستارى قدپ وكىلدەرىنىڭ ۋاقىتشا ۇستاۋ يزولياتورىندا ۇستالۋىنا نارازىلىقتارىن ءبىلدىردى.

– الماتىدا اكىمشىلىك قاماۋعا الىنعاندارعا ارنالعان ارنايى تۇرمە بار. ءبىراق جانبولات ماماي مەن رىسبەك توقتاسىن ءقازىر ول جەردە ەمەس، قاڭتارداعى قايعىلى وقيعادان كەيىن ۇستالعاندار، اياۋسىز ازاپتالعان الماتى قالالىق پوليسيا دەپارتامەنتىنىڭ ۋاقىتشا ۇستاۋ يزولياتورىندا وتىر. ءدال وسى الماتى قالالىق پوليسيا دەپارتامەنتىندە داۋرەن دوستياروۆتى ازاپتاعان كەزدە، مامايعا قارسى كۋالىك الماقشى بولعان. جانبولاتتى اكىمشىلىك قاماققا الدىق دەيدى، ءبىراق اكىمشىلىك قاماققا ارنالعان تۇرمەگە ەمەس، ءدال وسى (الماتى قالالىق پوليسيا دەپارتامەنتى - رەد) تۇرمەگە الىپ كەلىپ، قامايدى. سوندىقتان ءبىز جانبولاتتىڭ ومىرىنە، دەنساۋلىعىنا، قاۋىپسىزدىگىنە قاتتى الاڭدايمىز، – دەدى ينگا يمانباي الەۋمەتتىك جەلىدەگى ۆيدەوۇندەۋىندە.