ءبىر توپ بۇرىنعى گەنەرال جانە پولكوۆنيك 11 ناۋرىزدا استانادا باسپا ءسوز جيىنىن وتكىزىپ، وزدەرىن "زاڭسىز قىلمىستىق جاۋاپكەرشىلىككە تارتقانىن" مالىمدەدى. ولار وقيعاعا ۇقك-نىڭ بۇرىنعى باسشىسى، ءقازىر قاماۋدا وتىرعان كارىم ءماسىموۆتى كىنالاپ، ىستەردى قايتا قاراۋدى تالاپ ەتتى. بۇل تۋرالى ازاتتىق راديوسى حابارلادى.

باسىلىم مالىمەتىنشە، بۇرىنعى پولكوۆنيك مۇحتار قارابەكوۆ جيىندا 2017 جىلى ءوزىن استانا اكىمىنىڭ بۇرىنعى ورىنباسارى قانات سۇلتانبەكوۆپەن (استانا LRT ءىسى بويىنشا ايىپتالۋشىلاردىڭ ءبىرى) بىرگە "پارا الۋ" بابى بويىنشا "زاڭسىز" سوتتاعانىن ايتىپ، ءىستى قايتا قاراۋ قاجەتتىگىن العا تارتقان.

"مەنى [يمانعالي] تاسماعامبەتوۆ پەن [ادىلبەك] جاقسىبەكوۆكە قارسى كۋالىك بەرۋگە ماجبۇرلەدى. وفيسەر رەتىندە ودان باس تارتتىم، سول ءۇشىن سوتتالدىم" دەدى ول.

بۇرىنعى پولكوۆنيكتىڭ سوزىنە قاراعاندا، ونى "قورعانىس سالاسىنىڭ تاپسىرىسىن ورىندايتىنداردان اقشا الىپ، تاسماعامبەتوۆكە بەردى دەپ مويىنداتۋعا تىرىسقان".

ول تەرگەۋ كەزىندە ەكس-پرەزيدەنتتىڭ نەمەرە ءىنىسى سامات ءابىش تاراپىنان "قوقان-لوقى مەن قىسىم" كورگەنىن دە ايتتى.

قارابەكوۆتىڭ سوزىنشە، كەيىنگى ءبىر جارىم جىلدا 157 وفيسەر "بۇلتارتپاس دالەل-ايعاقسىز" "زاڭسىز سوتتالعان"، جەتەۋى جوعارعى سوت ۇكىمىمەن اقتالىپ شىققان. جيىندى وتكىزۋشىلەر قۋدالاۋدى توقتاتىپ، ءماسىموۆ باسشىلىق ەتكەن جىلدارى "قۇقاي كورگەن" اسكەري قىزمەتكەرلەرگە تاعىلعان ايىپتاردى الىپ تاستاۋدى سۇراعان

ازاتتىق راديوسى ەكس-اسكەريلەر جۋرناليستەرگە قىلمىستىق ىسكە تارتىلعان بۇرىنعى وفيسەرلەرلەردىڭ ءتىزىمى مەن ولار جايلى اقپارات بەرگەنىن، وندا 36 ادامنىڭ ءاتى-جونى بار ەكەنىن جازادى.

جيىندا "وفيسەرلەردىڭ قۋدالانۋىنان" بولەك، “كۇشتىك قۇرىلىمدارداعى جەمقورلىق” پەن ولارعا كەيبىر لاۋازىمدى تۇلعالاردىڭ قاتىسى جونىندە ايتىلدى. كونفەرەنسيادا ەكس-پرەزيدەنتتىڭ ۇلكەن قىزى داريعا نازاربايەۆانىڭ دا اتى اتالدى.

بيلىك ازىرگە رەاكسيا بىلدىرمەدى.

استانادا وسى جيىن وتكەن كۇنى كەيبىر تەلەگرام-ارنالار باس پروكۋراتۋرانىڭ ۆەدومستۆوارالىق تەرگەۋ-جەدەل توبى 2019 جىلى زەينەتكە شىققان بۇرىنعى ساياساتكەر يمانعالي تاسماعامبەتوۆتىڭ “استانا لرت” جوباسىنداعى جەمقورلىققا ىقتيمال قاتىسىن "تەكسەرە باستاعانىن" حابارلاعان. 11 ناۋرىزدا كۇندىز باس پروكۋراتۋرانىڭ باسپا ءسوز حاتشىسى دارحان دۇيسەبايەۆ بۇل جونىندە ازاتتىققا “نە ءيا، نە جوق دەپ ايتا المايمىن” دەدى. “ازىرگە اقپارات جوق” دەنەگ.