بۇگىن «AMANAT» پارتياسىنىڭ ءموبيلدى قوعامدىق قابىلداۋى ءوز جۇمىسىن باستادى. بۇل باستاما پارتيانى ترانسفورماسيالاۋ جۇمىستارىنىڭ ازاماتتارمەن كەرى بايلانىستى كۇشەيتۋ تارماعىنىڭ اياسىندا جۇزەگە اسىرىلۋدا. ءبىرىنشى بولىپ قاراعاندى جانە اقمولا وبلىستارىنىڭ 10 شالعاي ەلدى مەكەنىندە ءموبيلدى قوعامدىق قابىلداۋلار اشىلدى.
كەزەكتەن تىس ءححىى سەزدە «AMANAT» پارتياسىنىڭ ءتوراعاسى قاسىم-جومارت توقايەۆ پارتيا جۇمىسىن قايتا قۇرۋدى تاپسىرىپ، قوعامدىق قابىلداۋ بولمەلەرى تەك شاعىمدارمەن عانا ەمەس، ەلدى دامىتۋ بويىنشا ناقتى يدەيالارمەن كەلەتىن ازاماتتار ءۇشىن ءوز ويلارى مەن ۇسىنىستارىن ورتاعا سالاتىن ورىنعا اينالۋى ءتيىس ەكەنىن اتاپ ءوتتى. «ازاماتتاردى كوشپەلى قابىلداۋدى ءجيى وتكىزىپ، شالعاي اۋىلداردىڭ تۇرعىندارىمەن كەزدەسۋ كەرەك»، - دەپ اتاپ ءوتتى سول كەزدە پارتيا ءتوراعاسى.
الداعى ءۇش ايدا ءموبيلدى قوعامدىق قابىلداۋلار قازاقستاننىڭ بارلىق وڭىرلەرىن ارالاپ، شالعاي اۋىلدارعا ەرەكشە كوڭىل بولەدى. ءموبيلدى قابىلداۋ بولمەلەرىنىڭ جۇمىسىنا ءماسليحات دەپۋتاتتارى - پارتيا فراكسياسىنىڭ مۇشەلەرى، وڭىرلىك فيليالداردان بيۋرو مەن ساياسي كەڭەس مۇشەلەرى، قوعامدىق كەڭەستەر مەن مەملەكەتتىك ورگانداردىڭ وكىلدەرى جانە ت.ب. قاتىسادى.
ءموبيلدى قوعامدىق قابىلداۋلار تۇراقتى تۇردە جۇمىس ىستەيتىن بولادى.
كۇنى بۇگىن پارتيا مۇشەلەرى اقمولا جانە قاراعاندى وبلىستارىنىڭ تۇرعىندارىمەن كەزدەسۋگە كەلدى. «AMANAT» پارتياسىنىڭ رەسپۋبليكالىق قوعامدىق قابىلداۋ بولمەسىنىڭ جەتەكشىسى ءاليا سادىربايەۆانىڭ ايتۋىنشا، ءبىرىنشى كۇنى 100-گە جۋىق ادام قابىلدانعان.
«اۋىل تۇرعىندارى پارتيانىڭ اۋداندىق نەمەسە وبلىستىق فيليالىنا ءاردايىم كەلە بەرمەيدى جانە ولارعا ماسەلەنى وبلىستىق ءماسليحاتتاعى پارتيا فراكسياسىنىڭ دەپۋتاتتارىنا جەتكىزۋ وڭاي ەمەس. ءبىز تۇرعىنداردىڭ ءتۇيىندى ماسەلەلەردى العا تارتىپ كەلۋىن كۇتىپ وتىرماي، ولارعا ءوزىمىز بارامىز. بۇل ءبىر رەتتىك اكسيا ەمەس، ەندى تۇراقتى تۇردە بولادى. بۇل ءتىپتى، شالعاي اۋىلداردىڭ پروبلەمالارىن نازارعا الىپ، سول بويىنشا جۇيەلى شەشىمدەر قابىلداۋ ءۇشىن اقپاراتتى تالداۋعا مۇمكىندىك بەرەدى»، - دەپ اتاپ ءوتتى ءاليا سادىربايەۆا.
قوعامدىق قابىلداۋعا العاشقىلاردىڭ ءبىرى بولىپ كەلگەن اقمولا وبلىسىنا قاراستى نوۆوسەلسكوە اۋىلىنىڭ تۇرعىنى سۆەتلانا پال ەلدى مەكەندى سۋمەن جابدىقتاۋ ماسەلەسىن كوتەردى. ونىڭ ايتۋىنشا، سۋمەن جابدىقتاۋ جەلىلەرىنىڭ ابدەن توزىعى جەتىپ، بۇگىندە كۇردەلى جوندەۋدى قاجەت ەتەدى.
«سۋدىڭ ءجيى-جيى ءۇزىلىپ قالۋى، مۇلدەم اقپاي قالۋى بىزدەرگە تاڭسىق جاعداي ەمەس. سوندىقتان دا سۋ اققان كەزدە ىدىستارىمىزدى تولتىرىپ الۋدى ادەت قىلعانبىز. بۇل قارت ادامدارعا، اسىرەسە جالعىزباستى ادامدار قيىندىق تۋعىزادى»، - دەدى سۆەتلانا پال.
ءوز كەزەگىندە ءموبيلدى قوعامدىق قابىلداۋدىڭ قۇرامىنا كىرگەن اتباسار اۋدانىنىڭ اكىمى امانبەك قالجانوۆ پارتيانىڭ سايلاۋالدى باعدارلاماسىن ورىنداۋ اياسىندا نوۆوسەلسكوە اۋىلىندا سۋمەن جابدىقتاۋ جەلىلەرىن تارتۋ جۇمىستارى بيىل باستالۋى ءتيىس ەكەنىن ايتتى.
قوعامدىق قابىلداۋدا بۇدان باسقا كوشەلەردى جارىقتاندىرۋ، جولداردى جوندەۋ، ينجەنەرلىك جەلىلەر مەن الەۋمەتتىك ينفراقۇرىلىمعا قاتىستى ماسەلەلەر كوتەرىلدى. اۋداندىق ءماسليحاتتاعى پارتيا فراكسياسىنىڭ ءتوراعاسى نۇرجان راحىموۆتىڭ ايتۋىنشا، ءاربىر ءوتىنىش بويىنشا جاۋاپتى تۇلعالار مەن ورىنداۋ مەرزىمدەرى بەلگىلەنەدى.
«پارتيالىقتار حالىقپەن تىكەلەي ديالوگ ورناتۋعا، ولاردىڭ تالاپ-تىلەكتەرى مەن سۇرانىستارىن تىڭداۋعا كەلدى، بۇل وتە دۇرىس. مۇنداي كەزدەسۋلەردى مۇمكىندىگىنشە ءجيى ۇيىمداستىرعان ءجون»، - دەگەن اقساقال حاسەن قالمەنبايەۆ اماناتتىقتارعا العىسىن ءبىلدىردى.
اماناتتىقتار اقمولا وبلىسىنا قاراستى نوۆوسەلسكوە، چاپايەۆسكوە، اقساي، ۇلگى، سابىندى سياقتى بارلىعى 5 اۋىلعا باردى. وسى كۇنى «AMANAT» پارتياسىنىڭ ءموبيلدى بريگادالارى قاراعاندى وبلىسىنىڭ شالعاي ەلدى مەكەندەرىنىڭ تۇرعىندارىنا دا قابىلداۋ وتكىزدى. پارتيالىقتار ەگەندىبۇلاق، شەشەنقارا، دۋبوۆكا، بيدايىق، ورىنباي اۋىلدارىندا بولدى.
ەگىندىبۇلاقتا جەرگىلىكتى تۇرعىندار مالعا ءشوپ جانە جايىلىمدىق جەرلەردىڭ جوقتىعىنا شاعىمداندى. ال، شەشەنقارا تۇرعىندارى ۇيالى بايلانىس پەن اۋىل ىشىندەگى جولداردىڭ ساپاسىنا قاتىستى ماسەلەلەردى العا تارتتى. دۋبوۆكادا ينجەنەرلىك جەلىلەردى جوندەۋ جانە گازداندىرۋ ماسەلەسى وزەكتى بولىپ تۇر. بيدايىق اۋىلىندا تۇرعىندار فەلدشەرلىك-اكۋشەرلىك پۋنكت سالۋدى جانە ەلەكتر قۋاتىنىڭ ساپاسىن جاقسارتۋ ءۇشىن قوسىمشا ترانسفورماتور ورناتۋدى سۇراپ وتىر. ورىنباي اۋىلىندا ارىز-شاعىمداردىڭ باسىم بولىگى توزىعى جەتكەن ەلەكتر جەلىلەرىنە قاتىستى بولسا، جەررگىلىكتى شارۋالار اۋىلشارۋاشىلىق تاۋار وندىرۋشىلەرىنىڭ نەسيە قاراجاتىنا قولجەتىمدىلىگىن ارتتىرۋدى تالاپ ەتۋدە. بارلىق سۇراقتار اماناتتىقتاردىڭ باقىلاۋىنا الىندى.
«AMANAT» پارتياسىنىڭ قوعامدىق قابىلداۋىنا جىل باسىنان بەرى 24،7 مىڭ ادام جۇگىنگەن. تۇرعىنداردى نەگىزىنەن الەۋمەتتىك قامسىزداندىرۋ – 32%، تۇرعىن ۇي-كوممۋنالدىق شارۋاشىلىق – 14%، جۇمىسپەن قامتۋ جانە ەڭبەك قۇقىقتارىنىڭ بۇزىلۋى – 11% سەكىلدى ماسەلەلەر تولعاندىرادى. وسى ماسەلەلەردىڭ 56%-ى شەشىمىن تاپتى. پارتيا تاراتقان مالىمەتكە سايكەس، ءموبيلدى قوعامدىق قابىلداۋدىڭ ىسكە قوسىلۋىنا بايلانىستى بۇل ساندار ايتارلىقتاي وسكەنىن.
