ءماجىلىس دەپۋتاتى قازىبەك يسا قاڭتارداعى مەملەكەتتىك توڭكەرىس ارەكەتىن ۇيىمداستىرۋشىلار تۇگەل انىقتالىپ، تەگىس جاۋاپقا تارتىلۋعا ءتيىس ەكەنىن ايتتى.
"ماسەلە ماسىموۆپەن عانا بىتە قالمايتىنىن، ءمانىسى تىم تەرەڭدە جاتقانىن ەلدىڭ ءبارى جاقسى ءبىلىپ وتىر! سوندىقتان بارلىق شىندىق اشىق ايتىلعاندا عانا ەل بيلىككە سەنەدى. ايتپەسە، سەنىمگە سەلكەۋ ءتۇسىپ، ساياسي ەرەۋىل جالعاسا بەرەدى. قاڭتار قاسىرەتى قايتالانباۋى ءۇشىن كۇشتىك قۇرىلىمداردى، ەڭ الدىمەن ۇلتتىق قاۋىپسىزدىك كوميتەتىن تازالاۋ قاجەت. قورعانىس مينيسترلىگى اتىنا ساي بولۋى ءتيىس. سىنالاپ سىرتتان كەلگەن، بارلىق دايىندىقتان وتكەن قاپتاعان لاڭكەستەر مەن سودىرلار ەلىمىزگە قالاي كىرگەن؟ ەلىمىزدە مەملەكەتكە قارسى توڭكەرىس ۇيىمداستىرىلۋىنا ءبىزدىڭ ارناۋلى ورگاندار نەگە جول بەرگەن؟ قۇزىرلى ورگانداردى ەل باسىنا كۇن تۋعاندا ساتىپ كەتكەندەردەن تۇگەل تازارتۋ كەرەك! جاڭا باسشىلارىنا پرەزيدەنت پەن پارلامەنت الدىندا انت قابىلداتۋ كەرەك! مەملەكەتتىك تىلدە عانا جازىلۋى ءتيىس انتتى ءتۇسىنىپ، تۇيسىنە الاتىنداردى عانا باسشىلىققا تاعايىنداۋ كەرەك! ويتكەنى، ءتىلىن قورعاي الماعاندار ەلىن دە قورعاي المايدى!" دەگەن ول ءدىني راديكاليزمگە زاڭمەن تىيىم سالاتىن كەز جەتتى دەپ سانايدى.
سونداي-اق ول ۇكىمەت جۇمىسىن سىناپ ءوتتى.
"جاڭا ۇكىمەتتىڭ جاڭاشا جۇمىسىن قاشان كورەمىز؟. اۋىل سول باياعى توزىپ بارادى. ءبىر سالاعا بىرنەشە باسشى بولسا دا، بىر-بىرىنە سىلتەپ، ەشكىم ەشنارسە شەشپەيدى. شەنەۋنىكتەر ەلمەن قالاي سويلەسۋدى بىلمەيدى. ۇكىمەتتىڭ ارەكەتسىزدىگى سونشا، ەگەر بارلىعىن اكىمدەرمەن قوسىپ بىرەر كۇن باسقا جاققا اكەتىپ قالسا دا، ەلدە ەشنارسە وزگەرمەيتىن جاعدايعا جەتتىك. ەندەشە ولاردىڭ نە كەرەگى بار؟.. بىزگە ەلدىڭ جاعدايىن جاقسارتاتىن، حالىقتىڭ تىلىندە سويلەسە الاتىن ۇلتتىق ۇكىمەت كەرەك!" دەيدى دەپۋتات.
قازىبەك يسا سونىمەن قاتار پارلامەنتتە “اق جول” فراكسياسى 10 جىلدان بەرى كوتەرىپ كەلە جاتقان شەتەلدەردەگى وفشورلىق ايماقتارعا كەتكەن 167 ملرد دوللاردى قايتارۋ ماسەلەسى كۇن تارتىبىنە قايتا شىققانىن ايتتى.
"پرەزيدەنت اتاپ ايتىپ، ارنايى تاپسىرما بەردى، ەندى ءتيىستى ورگاندار نە قاراپ، كىمدى كۇتىپ وتىرسىزدار؟ ەل جاعدايى قيىن، ال ءبىز حالىق قازىناسىنان ۇرلانعان ميللياردتاردى قايتارا الماي قاراپ وتىرمىز؟! نەگىزى، وليگارحتاردان قايىر تىلەگەندەي سۇراپ وتىرعانشا، مەندەلەيەۆ كەستەسىنىڭ ءبارى تابىلاتىن قازاق جەرىنىڭ قازبا بايلىعىن، كەنەن كەنىشىن ءتۇرلى قۇيتىرقى زاڭسىز جولدارمەن قولعا ءتۇسىرىپ بايىعانداردان سول بايلىقتىڭ، كەمىندە 80 پايىزىن، ال قازبا بايلىق ورىندارىن تۇگەل قازىناعا قايتارۋدى قاتاڭ تالاپ ەتۋ كەرەك! ويتكەنى، ول قازبا بايلىقتار ولاردىڭ دا، ەشكىمنىڭ دە اتا-باباسىنان قالعان مۇرا ەمەس، قۇداي بەرگەن قالىڭ قازاقتىڭ بايلىعى" دەيدى ول.
