دەموكراتيالىق پارتيا قۇرۋ بويىنشا ىنتالى توپ جەتەكشىسى، ساياسي بەلسەندى جانبولات ماماي قىلمىستىق ءىستى تەرگەۋ اياسىندا 2 ايعا قاماۋعا الىندى.

بەلسەندىنىڭ ۇستىنەن "پوليسيانى قورلادى، جالعان مالىمەت تاراتتى" دەگەن ايىپتار بويىنشا قىلمىستىق ءىس قوزعالعان.

بەلسەندىنىڭ ايەلى، جۋرناليست، قۇقىققورعاۋشى ينگا يمانباي پروكۋرور جانبولات مامايدى 2 ايعا قاماۋدى سۇراپ وتىرعانىن ايتقان. بەلسەندىنى قولداۋ ءۇشىن الماتى قالاسى پوليسيا دەپارتامەنتىنە بارعان ونىڭ جاقتاستارى جانبولات مامايدى بوساتپاسا، اشتىق جاريالايتىندارىن ءمالىم ەتكەن.

قاڭتار وقيعاسى قۇرباندارىن ەسكە الۋ ميتينگىنە قاتىسقانى ءۇشىن بەيبىت جيىن وتكىزۋ ءتارتىبىن بۇزدى دەگەن ايىپپەن 15 تاۋلىك قاماۋدا بولعان بەلسەندى اكىمشىلىك جازا مەرزىمى اياقتالار شاقتا تاعى 48 ساعاتقا قاماۋعا الىنعان. ول 12 ناۋرىز كۇنى اباقتىدان جازعان حاتىندا قىلمىسقا بارماعانىن ايتقان.

"ءقادىرلى اعايىن! مەنى ساياسي سەبەپتەرمەن، ساياسي قۋدالاۋدىڭ ناتيجەسىندە قاماۋعا الدى. پوليسيانى قورلادى، جالعان مالىمەت تاراتتى دەپ. ەشقانداي قىلمىس جاساعان جوقپىن. ءوز كىنامدى مويىندامايمىن. ءبىزدىڭ جولىمىز اق، ادال. قولداۋ كورسەتكەن بارشا اعايىنعا العىس ايتامىن. حالىقارالىق ۇيىمدار قولداۋ كورسەتۋى كەرەك دەپ سانايمىن. بىرگە جەڭەمىز!" دەلىنگەن حاتتا.

"جانبولاتقا قاتىستى اكىمشىلىك جازانىڭ سوڭىن قىلمىستىق ىسكە الماستىرۋدىڭ امالىنان ەكى بولجام جاساۋعا بولادى:

بىرىنشىدەن، بيىلعى جاز-كۇز ماۋسىمىندا مەرزىمىنەن بۇرىن پارلامەنتتىك سايلاۋ ءوتۋى مۇمكىن؛
قىلمىستىق جاۋاپكەرشىلىككە تارتىلعان (ەكى ايلىق تەرگەۋدەن كەيىن، سوت مامايعا ارى كەتكەندە بوستاندىعىن شەكتەۋ نەمەسە شارتتى جازا بەرەدى) ازامات رەتىندە جانبولات سايلاۋدان شەتتەتىلەدى (قازىرگى قولدانىستاعى سايلاۋعا قاتىستى زاڭدىلىقتارىنىڭ تالابى بويىنشا)؛

ەكىنشىدەن، پرەزيدەنت توقايەۆتىڭ ناۋرىز جولداۋىنان كەيىن، سايلاۋ جانە ساياسي پارتيالار تۋرالى زاڭدارعا ازداعان وزگەرىستەر ەنگىزىلەتىن بولسا، بيلىكپەن مامىلەلەسۋگە كونبەيتىن وپپوزيسيالىق ساياساتكەر جانبولاتتىڭ دەمپارتياسىن سايلاۋعا دەيىن "قاعىپ تاستاپ"، تىركەۋدەن وتكىزبەۋدىڭ ارەكەتى جاسالۋدا" دەيدى جۋرناليست.