ەرتەڭ ساعات 11:00-دە پرەزيدەنت قاسىم-جومارت توقايەۆ پارلامەنت پالاتالارىنىڭ بىرلەسكەن وتىرىسىندا قازاقستان حالقىنا جولداۋ جاسايدى. اقوردانىڭ باسپا ءسوز قىزمەتى جولداۋدا جۋىق ارادا جۇزەگە اسىرىلاتىن ساياسي رەفورمالاردىڭ جاڭا باعدارلاماسى مەن الەۋمەتتىك-ەكونوميكالىق باعىتتا اتقارىلاتىن ءىس-شارالار تۋرالى ايتىلاتىنىن حابارلادى.
قاڭتار وقيعاسىنان كەيىن پرەزيدەنت الداعى ۋاقىتتا ساياسي رەفورمالاردىڭ جاڭا پاكەتىن ۇسىناتىنىن الدەنەشە رەت ايتقان. ۇكىمەتكە حالىقتىڭ ءال-اۋقاتىن كوتەرۋگە باعىتتالعان ءىس-شارالار كەشەنىن ازىرلەۋدى تاپسىرىپ، شەتەل اسقان اقشانى قايتارۋ، ۋتيلالىم مولشەرىن تومەندەتۋ، قورعاس كەدەنىندەگى كولەڭكەلى ساۋدانى رەتكە كەلتىرۋدى جۇكتەگەن. بيزنەسمەندەردى "قازاقستان حالقىنا" قورىنا تۇراقتى تۇردە قارجى اۋدارۋعا شاقىرعان.
ايتىلعان اڭگىمە، كوتەرىلگەن ماسەلە، بەرىلگەن تاپسىرما كوپ بولعانىمەن، ونىڭ ىسكە اسۋى شامالى بولىپ تۇر. ۇكىمەت تۇرعىنداردىڭ تۇرمىسىن تۇزەۋگە باعىتتالعان ناقتى باعدارلاما ءالى ۇسىنبادى. شەتەل اسقان اقشانى قايتارۋعا قاتىستى قام-قارەكەت مۇلدە بايقالمايدى. ۋتيلالىم مولشەرىن 50 پايىزعا تومەندەتۋدى اۆتونارىق ماماندارىنىڭ بىردە-بىرى وڭ باعالاپ وتىرعان جوق. قورعاستاعى ماسەلەلەر تۋرالى دا سوڭعى ۋاقىتتا ەشتەڭە ايتىلماي كەتتى. العاشقىدا "قازاقستان حالقىنا" قورىنا قارجى اۋدارۋشىلار تۋرالى كۇنىنە بىرنەشە اقپارات شىعۋشى ەدى، سوڭعى ۋاقىتتا ول قوردىڭ بارىن دا كوپشىلىك ۇمىتا باستاعانداي.
بۇدان بولەك قاڭتار وقيعاسىنداعى بۇلىكتى ۇيىمداستىرۋشىلاردىڭ كىم ەكەنىن، قىرعى كەزىندە قازا تاپقان 230 ادامنىڭ ءاتى-جونى ءالى جاريالانعان جوق. ۋكرايناعا رەسەيدىڭ باسىپ كىرۋىنە بايلانىستى قازاقستاننىڭ پوزيسياسى، اگرەسسور كورشىمەن قارىم-قاتىناس قالاي بولاتىنى تۋرالى دا بيلىك ءۇنسىز. كۇن سايىن قۇلدىراپ جاتقان تەڭگە مەن وعان ىلەسىپ كەلىپ جاتقان قىمباتشىلىققا قارسى ۇكىمەت نە ىستەيتىنى بەلگىسىز. ەۋرازيالىق ەكونوميكالىق وداقتان شىعۋعا شاقىرىپ جاتقان ەكونوميستەردىڭ دابىلى ەسكەرىلە مە، وعان بيلىك ساياسي جىگەر تانىتا الا ما؟ ول جاعى دا بەيمالىم كۇيدە.
وسى سان ساۋالدىڭ بارىنە بولماسا دا، ءبىرسىپىراسىنا حالىق ەرتەڭگى جولداۋدان جاۋاپ العىسى كەلەدى. قوعامدا جولداۋدى پرەزيدەنتتىڭ ەلدى وزگەرىسكە باستايتىنىنا دەگەن سەنىمنىڭ سوڭعى جۇرناعى ەسەبىندە قابىلدايتىن كوڭىل-كۇي ورناپ تۇر. توقايەۆ ەرتەڭ ءۇمىت وتىن جاعا الا ما، الدە ءسوندىرىپ تىنا ما؟ بۇل جونىندە ناقتى كەسىپ ايتىپ جاتقاندار از. رەسمي ۇستانىمدى ءبىلدىرىپ جۇرگەن ساراپشى-ساياساتتانۋشىلار دا ەرتەڭگى جولداۋ مازمۇنى تۋرالى قوعامعا ينسايدتار تاستاپ جاتقان جوق.
تەك ءماجىلىس دەپۋتاتى ايدوس سارىم سوڭعى سۇحباتتارىندا پرەزيدەنت 16 ناۋرىزدا پارتيالاردى تىركەۋدى جەڭىلدەتۋ، سايلاۋ تۋرالى زاڭنامانى وزگەرتۋ دەگەن سياقتى ماسەلەلەردى كوتەرۋى مۇمكىن ەكەنىن ايتتى.
بەيتاراپ ساراپشىلار مەن ساياساتتانۋشىلار بولجامنان گورى ۇسىنىس ايتۋ، قازاقستاندى وزگەرتۋ ءۇشىن نە ىستەۋ كەرەك، ساياسي رەفورما نەدەن باستالۋى كەرەك دەگەن سۇراقتاردىڭ جاۋابىن ىزدەۋگە بەيىل.
پىكىر قالدىرۋ