ۋكراينا قارۋلى كۇشتەرى تاڭعى بريفينگىن جاريالاپ، "باسقىنشى اسكەر توبىنا جويقىن سوققىلار" جاساي العانىن مالىمدەدى.
ولاردىڭ ايتۋىنشا، ۋكراين اۋە كۇشتەرى رەسەيدىڭ ءۇش اسكەري ۇشاعىن، ءبىر تىكۇشاقتى، ءۇش ۇشقىشسىز ۇشاتىن اپپاراتتى جويىپ، ەكى زىمىراندى اتىپ تۇسىرگەن.
ۋكراينا ارمياسى سونداي-اق رەسەي وسى اپتادا "ۋكراينا قالالارىنىڭ حالىق تىعىز ورنالاسقان اۋداندارىن" بومبالاۋدى جالعاستىرعانىمەن، دونەستك، لۋگانسك جانە نيكولايەۆ سياقتى بىرنەشە مايداندا العا جىلجي الماعانىن ايتتى.
"جاۋ بەلگىلى ءبىر ايماقتاردا شەگىنىپ، شىعىنعا ۇشىراۋدا" دەلىنگەن حابارلامادا.
كەشە تۇندە جاريالانعان حابارلامادا ۋكراينا ارمياسى رەسەي باسىپ العان جەرلەردى ۇستاپ تۇرۋعا تىرىسىپ جاتقانىن، سونىمەن قاتار ماسكەۋ اسكەري كۋرسانتتاردى مايدانعا شاقىرۋعا ءماجبۇر بولعانىن مالىمدەدى.
سونداي-اق رەسەي اسكەري شىعىننىڭ ورنىن تولتىرۋ ءۇشىن شەتەلدىك جاۋىنگەرلەردى ىزدەپ جاتقانى حابارلاندى.
كەيبىر ساراپشىلار رەسەي ۋكراينانىڭ تۇراقتى جانە قاتتى قارسىلىعىنا ۇشىراپ، شابۋىل وپەراسيالارىن جالعاستىرۋدا قيىندىققا تاپ بولىپ جاتقانىن ايتادى.
پىكىر قالدىرۋ