قوعام بەلسەندىسى، جۋرناليست ساۋلە ءابىلداحان قىزى ايەلدەر پارتياسىن قۇراتىنىن ءمالىم ەتتى.
"ءاقجۇنىس" ايەلدەر پارتياسىن قۇرامىن!!! بارلىق قازاق ايەلدەرى، بىرىگىڭدەر!.. كىم جاڭا پارتيا زاڭگەرى بولعىسى كەلەدى، وز-وزىڭىزگە، بىلىكتىلىگىڭىزگە سەنىمدى بولساڭىز، حابارلاسىڭىز! 2-3 جىل بۇرىن قوعامدىق بىرلەستىگىمدى تىركەيتىن مەكەنجاي تاپپاي، قىرىق تۋىس، ءجۇز دوسقا جالىنىپ، "زيانىڭ تيەدى، بيلىك مەنىڭ سوڭىما ءتۇسىپ الادى، قورقامىن" دەپ، ەشكىم ءوز ۇيىنە تىركەگىسى كەلمەي، اقىرىندا قولىمدى ءبىر سىلتەپ قويعان ەدىم. ايەلدەر پارتياسىن پروپيسكاعا قوياتىن ادام تابىلا ما ەكەن؟..." دەيدى جۋرناليست.
ساۋلە ءابىلداحان قىزى ابەدينوۆا 1972 جىلعى 29 قاڭتاردا دۇنيەگە كەلگەن. تەمىربەك جۇرگەنوۆ اتىنداعى قازاق ۇلتتىق ونەر اكادەمياسىنىڭ تەاتر جانە كينو فاكۋلتەتىن "تەاترتانۋشى، ونەر مەكەمەلەرىنىڭ مەنەدجەرى" ماماندىعى بويىنشا بىتىرگەن. "ونەرتانۋ ماگيسترى" ماگيسترلىك دارەجەسى بار.
ەڭبەك جولىن "قازاق ادەبيەتى" گازەتىندە مادەنيەت ءبولىمىنىڭ مەڭگەرۋشىسى بولىپ باستاعان. ەل اراسىنا "قازاقستان" ۇلتتىق ارناسىنىڭ "ءاقجۇنىس" باعدارلاماسىنىڭ اۆتورى ءارى جۇرگىزۋشىسى رەتىندە كەڭىنەن تانىلدى. كەيىنگى جىلدارى "ءاقجۇنىس-استانا" جۋرنالىن شىعارعان.
كەيىنگى جىلدارى قوعامدىق بەلسەندىلىكپەن اينالىسىپ ءجۇر. قوعامدىق بەلسەندى ەسەبىندە سايراگۇل سايىتباي ىسىنە، كوپبالالى انالار ىسىنە ارالاستى.
قاڭتار وقيعاسىنان كەيىن بىرنەشە ازامات پارتيا قۇرۋ تۋرالى نيەتىن جاريالاعان. ساياساتتانۋشى سانجار بوقايەۆ "نامىس"، "بايتاق بولاشاق" ەكولوگيالىق اليانسى قوعامدىق بىرلەستىگىنىڭ پرەزيدەنتى ازاماتحان ءامىرتاي ولجاس سۇلەيمەنوۆ، توقتار اۋباكىروۆپەن بىرگە ەكولوگيالىق "بايتاق" پارتياسىن، بەلگىلى بيزنەسمەن بولات ءابىلوۆ پارتيا قۇراتىنىن ءمالىم ەتكەن.
سونداي-اق ساياسي الاڭدا 2019 جىلى وپپوزيسيالىق بەلسەندى جانبولات ماماي جەتەكشىلىك ەتەتىن "دەموكراتيالىق پارتيا" پايدا بولدى. بەلسەندىنىڭ پارتيانى تىركەمەك بولعان 2020 جىلعى ارەكەتى ءساتسىز اياقتالعان. پوليسيا "دەمپارتيا" جاقتاستارىن شەتىنەن تۇتقىنداعاننان كەيىن، بەلسەندىلەر قۇرىلتايدىڭ ورنىنا ميتينگ وتكىزگەن.
2019 جىلى بەلسەندى توعجان قوجالييەۆا حاق (حالىققا ادال قىزمەت)، بيزنەس-ترەنەر احمەتجان نۇرسيلا "سەن" اتتى پارتيا قۇراتىنىن ءمالىم ەتكەن. ودان بەرى توعجان قوجالييەۆا كەي-كەيدە بەلسەندىلىك تانىتىپ ءجۇر. الايدا تۇپكى ويىندا ما، جوق ازىرگە بەلگىسىز. ال احمەتجان نۇرسيلانىڭ بۇل باعىتتاعى بەلسەندىلىگى بايقالمايدى.
بۇگىن پرەزيدەنت ق.توقايەۆ پارتيالاردى تىركەۋ پروسەدۋراسى جەڭىلدەيتىنىن، تىركەۋ تابالدىرىعى 4 ەسەگە 20 مىڭ ادامنان، 5 مىڭ ادامعا دەيىن تومەندەتىلەتىنىن ايتتى. سونداي-اق ايماقتىق وكىلدىكتەردىڭ سانى 600-دەن 200 ادامعا، باستاماشىل توپ وكىلدەرى 700 ادامعا دەيىن تومەندەتىلەتىنىن جەتكىزدى.
پرەزيدەنت جولداۋىنان كەيىن قوعام بەلسەندىسى مۇحتار تايجان "جەر قورعانى" دەگەن اتاۋمەن پارتيا قۇراتىنىن جاريالادى.
