يندۋستريا جانە ينفراقۇرىلىمدىق دامۋ مينيسترلىگى ەكولوگيا، گەولوگيا جانە تابيعي رەسۋرستار مينيسترلىگىمەن بىرلەسە وتىرىپ، "جاسىل دامۋ" اق قاراجاتى ەسەبىنەن قازاقستان رەسپۋبليكاسى ازاماتتارىنىڭ جەڭىلدەتىلگەن نەسيەگە جەڭىل اۆتوكولىكتەر ساتىپ الۋى، سونداي-اق اۆتوبۋستار پاركىن جاڭارتۋ باعدارلاماسىن ازىرلەپ جاتقانىن ءمالىم ەتتى.
"جەڭىلدەتىلگەن نەسيەلەندىرۋ باعدارلاماسى بويىنشا قارجىلاندىرۋدىڭ جالپى سوماسى شامامەن 100 ملرد تەڭگەنى جانە قازاقستان ايماقتارىندا اۆتوبۋستاردى جاڭارتۋعا شامامەن 30 ملرد تەڭگەنى قۇرايدى. وتاندىق وندىرىلگەن تەحنيكانى ساتىپ الۋ شارتتارى، سونداي-اق قارجىلاندىرۋ ءتارتىبى مەملەكەتتىك ورگانداردا كەلىسۋ راسىمدەرىنەن ءوتۋ ساتىسىندا. ءساۋىر ايىنىڭ سوڭىنا دەيىن بارلىق راسىمدەردى اياقتاۋ جوسپارلانۋدا" دەلىنگەن حابارلامادا.
مينيسترلىك مالىمەتىنشە، جەڭىلدەتىلگەن نەسيەدە كەي جاعدايدا باستاپقى جارناسى بولمايدى. نەسيەنىڭ ماكسيمالدى مەرزىمى 7 جىل. نەسيەنىڭ ماكسيمالدى سوماسى 10 ملن تەڭگە تەڭگەدەن اسپايدى. پايىزدىق مولشەرلەمە ازىرگە بەلگىسىز.
پىكىر قالدىرۋ