نۇر-سۇلتان قالاسىندا "ءبىلىم-يننوۆاسيا" حقق قولداۋىمەن "ءبىلىم جانە دەنساۋلىق – 2022" كورمەسى ءوتتى. اتالمىش شارانىڭ سالتاناتتى اشىلۋىنا ارنايى ق ر بجعم ۆيسە-مينيسترى كارينوۆا شولپان تاڭات قىزى جانە "ءبىلىم-يننوۆاسيا" حقق پرەزيدەنتى وتە دارحان ەرماحان ۇلى قاتىستى.
"ءبىلىم جانە دەنساۋلىق – 2022" كورمەسىنىڭ اشىلۋىندا العاش بولىپ ءسوز العان ق ر بجعم ۆيسە-مينيسترى شولپان كارينوۆا: "ق ر پرەزيدەنتى قاسىم-جومارت توقايەۆ 2022 – "بالالار جىلى" دەپ جاريالاعانى بارشامىزعا ايان. وسى ماقساتتا وقۋشىلارىمىزدىڭ تىڭ باستامالارىن قولداۋعا دايىنبىز. جالپى بالالاردىڭ عىلىمعا، بىلۋگە، جاڭاشىلدىققا قۇشتارلىعى ءبىزدى قۋانتادى. بۇگىن وسى كورمەگە جينالعان وقۋشىلارىمىزدىڭ ءار جۇمىسى ۇلكەن جەتىستىك" دەپ ءسوزىن تۇيىندەدى.
"ءبىلىم-يننوۆاسيا" حقق پرەزيدەنتى دارحان وتە "ەل بولاشاعى جاستارىمىزدىڭ بۇل العاشقى قادامى الەمدىك ءىرى عىلىمي جوبانىڭ اشىلۋىنا سەپ بولادى. وسىنداي تالاپتى جاستىڭ ءبىلىمىن جەتىلدىرگەن ۇستازدار قاۋىمىنا العىس بىلدىرەمىن" دەدى.
كورمەنى تاماشالاۋعا كەلگەن جۇرتتىڭ قاراسى قالىڭ. اسىرەسە، بالالاردىڭ عىلىمي جوبالارىنا قىزىعۋشىلىق تانىتقان قالا تۇرعىندارى مەن قوناقتارى ءار ستەندتىڭ جانىنان شىقپاي بار ىنتاسىمەن تىڭداپ، سۋرەتكە ءتۇسىردى.
كورمەگە "ءبىلىم-يننوۆاسيا" حقق جانە "ءبىلىم وردا" حقق قاراستى ءبىرقاتار مەكتەپ-ليسەي وقۋشىلارىنىڭ جۇمىستارى قويىلدى.
جالپى، سوڭعى ۋاقىتتا ۇلتتىڭ ساۋلىعى وتە وزەكتى تاقىرىپ. دۇنيە ەلدەرى ۇرپاقتىڭ ءبىلىمدى ءھام دەنى ساۋ بولۋىنا باستى نازاردى اۋدارىپ وتىر. كورمەدە دە وقۋشىلار زامانداستارىنا زياندى ارەكەتتەن اۋلاق بولۋىنا، سالاۋاتتى ءومىر سالتىن ۇستانۋىنا ءۇن قوسۋدى ءوز جوبالارى ارقىلى كورسەتتى. سونداي-اق سوڭى تەحنولوگيالار بويىنشا ءتۇرلى يننوۆاسيالىق جوبالاردى قۇراستىرىپ، ۋاقىتى مەن ءبىلىمىن ارناعان وقۋشىلاردىڭ ەڭبەگى كوپشىلىك كوڭىلىنەن شىقتى.
ءبىلىم-يننوۆاسيا" حقق باسپا ءسوز قىزمەتى
پىكىر قالدىرۋ