جۋرناليست، اقپارات سالاسىنىڭ ۇزدىگى ءىلياس ىسقاقوۆ ناۋرىز مەرەكەسىن جاڭا جىل دەڭگەيىندە تويلاۋعا شاقىرىپ، ەرەكشە باستاما كوتەردى. ول ءۇشىن «جاڭا كۇن» كونسەپسياسى ۇسىنىلىپ وتىر. كونسەپسيا ناۋرىز مەرەكەسىن – «جاڭا كۇن» مەرەكەسى دەپ بەلگىلەۋءدى كوزدەيدى. ماقسات – «جاڭا كۇندى» قازاقتار عانا ەمەس، كۇللى قازاقستاندىقتاردىڭ مەرەكەسىنە اينالدىرۋ.

جۋرناليست ۇلىستىڭ ۇلى كۇنى قازاقستاندىقتار ءۇشىن جاڭا جىل سەكىلدى ورتاق مەرەكە رەتىندە قالىپتاسپاي كەلۋىنىڭ سەبەبىن  ناۋرىزدى وزگە ۇلت وكىلدەرى  قازاقتىڭ ۇلتتىق مەرەكەسى، جاڭا جىلى دەپ قابىلدايتىنىمەن بايلانىستىرادى. سوندىقتان ءىلياس باشار ۇلى 22 ناۋرىزدى بارشاعا ورتاق «جاڭا كۇن» مەيرامى رەتىندە بەكىتۋدى ۇسىنادى. ودان بولەك، ول «جاڭا كۇن» مەيرامىنىڭ دا ءوز نىشانى بولۋى كەرەك ەكەنىن العا تارتادى. باشار ۇلىنىڭ سوزىنشە، مەرەكەنىڭ بەلگىسى رەتىندە كۇن سيمۆوليكاسى تاڭدالسا، مەيرامدا كۇن پىشىمدەس اشىق حاتتار مەن سىيلىقتار تابىستالۋعا ءتيىس.

– ادامدار ءۇشىن بۇل كۇن قايتا تۇلەۋدى، جاڭارۋدى، تازالانۋدى ءبىلدىرمەك. قايتا قالىپتاسۋ مەن جاڭالىقتىڭ ەنەرگياسى نۇر شاشاتىن كۇن. جاندۇنيەڭدى  تازارتىپ، زۇلىمدىق پەن قاتىگەزدىكتەن ارىلۋعا، سۇيىسپەنشىلىككە، تاتۋلىققا، بەيبىتشىلىككە، اۋىزبىرشىلىككە شاقىرادى. جانىڭدى، وتباسىڭدى، ءۇي-ىشىن تازالاۋدى مىندەتتەيدى. جىلىلىق پەن جاڭا ءۇمىت اكەلەدى.  بۇل كۇنى ادامدار بىر-بىرىنە دەگەن وكپەسىن ۇمىتىپ، كەشىرىمدى بولۋعا شاقىرادى. تاتۋلىق پەن دوستىقتى پاش ەتەدى. وسىنىڭ ءبارى ءاربىر ازاماتقا ورتاق تىلەك، قاسيەت! ەندەشە «جاڭا كۇن» يدەولوگياسىن ءاربىر قازاقستاندىقتىڭ بويىنا ءسىڭىرىپ، جىلدا «جاڭا كۇن» مەرەكىسىن بارلىعىمىز قارسى الاتىنداي، ۇلتقا، ۇلىسقا بولىنبەي بارلىعىمىزعا ورتاق مەرەكە رەتىندە تويلايتىنداي دارەجەگە كوتەرەتىن كەز كەلدى دەپ ويلايمىن، – دەيدى جۋرناليست.