18-19 كۇندەرى قمدب ءتوراعاسى ناۋرىزباي قاجى تاعان ۇلى اقتوبە وبلىسىندا ىس-ساپارمەن بولدى.

ساپاردىڭ العاشقى كۇنى وبلىس اكىمى وڭداسىن ورازالينمەن كەزدەسۋدەن باستالدى. ودان كەيىن باس ءمۇفتي «يحسان – رۋحاني تاربيە نەگىزى» جانە «تولىق ادام» كىتابىنىڭ تانىستىرىلىمىنا قاتىسىپ، وڭىردەگى زيالى قاۋىم وكىلدەرىمەن سۇحباتتاستى.

ناۋرىزباي قاجى تاعان ۇلى «ءاس-سالام» جەكە قايىرىمدىلىق مەكەمەسىنىڭ (مەدرەسە) اشىلۋ راسىمىندە ءدىني باسقارما باستاماسىن قولداپ، قايىرىمدىلىق مەكەمەسىن سالۋعا دەمەۋشى بولعان ازاماتتارعا ايرىقشا العىسىن ءبىلدىردى.

مۇنان سوڭ ق ر ىشكى ىستەر مينيسترلىگى قىلمىستىق اتقارۋ-جۇيەسى كوميتەتىنىڭ «كا-168/1 مەكەمەسىندە» «جۋسان» وپەراسياسى ارقىلى ەلگە ورالعان جانە تەرروريزم بابى بويىنشا جازاسىن وتەۋشىلەرمەن جالپى جانە جەكە كەزدەسۋلەر وتكىزىپ، ناسيحات ايتىپ، تۇسىندىرمە جۇمىستارىن جۇرگىزدى.

باس ءمۇفتي جازاسىن وتەۋشىلەرمەن كەزدەسكەننەن كەيىن «Aqtobe» تەلەارناسىنداعى «ءساتى تۇسكەن سۇحبات» باعدارلاماسىندا قوناق بولدى. ساپاردىڭ ءبىرىنشى كۇنى وبلىستىق ورتالىق «نۇر عاسىر» مەشىتىندە قالا جانە اۋدان يمامدارىمەن كەزدەسىپ، ءدارىس وتۋمەن قورىتىندىلاندى.

ەكىنشى كۇنى باس ءمۇفتي ناۋرىزباي قاجى تاعان ۇلى «يگى ىستەر» قايىرىمدىلىق مارافونىنا قاتىسىپ، «ايالا» وڭالتۋ ورتالىعىنداعى بالالارمەن جۇزدەستى. سونداي-اق «MUNARA TV» تەلەارناسىنىڭ وسى وڭىردەگى فيليالىنىڭ اشىلۋ راسىمىنە قاتىستى.

قمدب ءتوراعاسى وبلىستىق ورتالىق «نۇر عاسىر» مەشىتىندە «زەكەت جانە قايىرىمدىلىق» قورىنىڭ «ەل ۇلەسى – پاتەرگە» اتتى قايىرىمدىلىق اكسياسى اياسىندا رەسپۋبليكا بويىنشا 531، 532ء-شى اقتوبە ءوڭىرى بويىنشا 23، 24ء-شى باسپانا كىلتىن اقتوبە وبلىسى مۇعالجار اۋدانى ەمبى قالاسىندا تۇراتىن ءبىر كوپبالالى، جالعىزباستى (4 قىز، 3 ۇل، ياعني 7 بالانىڭ) جانە ءبىر مۇمكىندىگى شەكتەۋلى اناعا تابىستادى.

مۇنان بولەك باس ءمۇفتي اقتوبە وبلىسىنا بارعان ساپارى اياسىندا «اقتوبە» مەدرەسە-كوللەدج شاكىرتتەرىنە ءدارىس وقىپ، قالادا سالىنىپ جاتقان جاڭا ءدىني وقۋ ورداسىنىڭ قۇرىلىسىمەن تانىستى. سونىمەن قاتار «يسلام – ىنتىماق پەن بىرلىك» جىلى اياسىندا وتكەن وبلىستىق قازاق كۇرەسىنەن ەرەسەكتەر اراسىندا اشىق ءتۋرنيردىڭ جەڭىمپازدارىن ماراپاتتادى. قمدب ءتوراعاسى ناۋرىزباي قاجى تاعان ۇلى اقتوبە وبلىسىنا جاساعان ساپارى تەمىر اۋدانى، شۇبارقۇدىق كەنتىندەگى دوسجان يشان قاشاق ۇلىنىڭ كەسەنەسىنە زيارات ەتىپ، بابا رۋحىنا قاسيەتتى قۇران اياتتارىن باعىشتاۋمەن قورىتىندىلاندى.

اقتوبە وبلىستىق ورتالىق «نۇر عاسىر» مەشىتىنىڭ باسپا ءسوز قىزمەتى