الماتى قالاسىنىڭ باس يمامى تولەبي ءدادىل ۇلىنىڭ شاقىرۋىمەن قوعامدىق كەڭەس مۇشەلەرى، قوعام بەلسەندىلەرى مەن جۋرناليستەر مەرەكەلىك داستارحاندا باس قوستى.
كۇن مەن ءتۇننىڭ تەڭەلەر، جەر بۋسانىپ كوكتەمنىڭ شىرايى كەلەتىن ۇلتتىق مەرەكە - ءاز-ناۋرىز! وسىناۋ ايتۋلى مەرەكە قارساڭىندا الماتى ورتالىق مەشىتىنىڭ اۋلاسىندا قازاقى كيىز ءۇي تىگىلىپ، جايىلعان سالتاناتتى داستارحاندا ناۋرىز كوجە تارتۋ ەتىلدى.
قوعامدىق كەڭەس مۇشەلەرى، قوعام بەلسەندىلەرى مەن جۋرناليستەر ويۋمەن ورنەكتەلگەن ون ەكى قاناتتى اق بوز ۇيدە ۇلتتىق سۋسىن-تاعامداردان ءدام تاتىپ، اسەرلى اڭگىمە مەن اق تىلەكتەر جولدادى. ەل تاۋەلسىزدىگىنىڭ تىنىشتىعى مەن تۇراقتىلىعى جولىندا ءداستۇر مەن ءدىننىڭ ساباقتاستىعى اسا ماڭىزعا يە ەكەنىن تىلگە تيەك ەتتى.
كەلگەن قوناقتارعا كادەسىي رەتىندە قمدب ءتوراعاسى ناۋرىزباي قاجى تاعان ۇلىنىڭ ناۋرىز مەرەكەسىمەن ارنايى قۇتتىقتاۋ حاتى، ءمۇفتيات باسپاسىنان جاقىندا جارىق كورگەن "قازاقستانداعى يسلام تاريحى" كىتابى مەن ۇلتتىق ءدام سالىنعان قوراپتار ۇلەستىرىلدى.
"ناۋرىز - باعزى زاماننان بەرى ۇلت رەتىندە ەرەكشە ءمان بەرىپ كەلە جاتقان ۇلتتىق مەرەكەمىز. بۇل كۇندە دۋالى اۋىز اقساقالدار داستارحان باسىندا باتا بەرىپ، رەنجىسكەندەر كەشىرىم جولىن ۇستانىپ، تاتۋلاسۋ سىندى ساۋاپتى ءھام سالاۋاتتى شارالار بىرىنە-بىرى ۇلاسىپ جاتادى. اللا تاعالا وسىنداي شۋاقتى كۇندەرىمىزدى ەسەلەسىن!"، - دەلىنگەن باس ءمۇفتي قۇتتىقتاۋ حاتىندا. 
وسى ورايدا قوناقتار الماتى ورتالىق مەشىتى ۇجىمى مەن ءدىن قىزمەتكەرلەرىنە العىس ايتىپ، جۇمىستارىنا ساتتىلىك تىلەدى. حالىق بىرلىگى مەن ىنتىماعى ءۇشىن دۇعا جاسالىپ، باتا بەرىلدى.
الماتى ورتالىق مەشىتىنىڭ باسپا ءسوز قىزمەتى
پىكىر قالدىرۋ