الماتىدا پرەزيدەنت قاسىم-جومارت توقايەۆتىڭ جولداۋىندا ايتىلعان ساياسي رەفورمالار باعدارلاماسىن قولداۋ ماقساتىندا «AMANAT» پارتياسى قالالىق فيليالىنىڭ ۇيىمداستىرۋىمەن ميتينگ ءوتتى.

شوقان ءۋاليحانوۆ اتىنداعى الاڭدا وتكەن بەيبىت شەرۋگە كوپتەگەن سالانىڭ وكىلدەرى قاتىستى. ولاردىڭ ىشىندە پارتيا جانە قوعام بەلسەندىلەرىنەن بولەك، ءماجىلىس دەپۋتاتتارى، كاسىپكەرلەر، عىلىم مەن مادەنيەت سالاسىنىڭ وكىلدەرى، سپورتشىلار، جاستار جانە قالا تۇرعىندارى بار.

ميتينگكە قاتىسۋشىلار ساياسي جۇيەنى كەشەندى جاڭعىرتۋ باعدارلاماسىن قولدايتىندارىن ءبىلدىرىپ، ارنايى ترانسپارانتتارمەن كەلدى.

جينالعاندار الدىندا ءسوز سويلەگەن «AMANAT» پارتياسىنىڭ اتقارۋشى حاتشىسى اسحات ورالوۆ جاڭا سىن-قاتەرلەر جاعدايىندا بىرىگىپ، تاۋەلسىزدىگىمىزدى قورعاۋ، اتا-بابا اماناتىن كەيىنگى ۇرپاققا تۇتاس جەتكىزۋ باستى پارىز ەكەنىن العا تارتتى.

– ءبىزدىڭ باعىتىمىز – ايقىن، ماقساتىمىز – ورتاق. ءبىز – كوزى اشىق، كوكىرەگى وياۋ ازاماتتاردى بىرلەسىپ جۇمىس ىستەۋگە شاقىرامىز! باسقا پارتيالار بيلىككە جەتۋدى كوزدەسە، ءبىز ەڭ اۋەلى تاۋەلسىز قازاقستاننىڭ مۇددەسى ءۇشىن جۇمىس ىستەيمىز! ارداقتى اعايىن، اباي اتامىزدان قالعان امانات ءسوز بار: «ءبىرىڭدى قازاق، ءبىرىڭ دوس، كورمەسەڭ ءىستىڭ ءبارى بوس». سوندىقتان، كۇشىمىزدىڭ بىرلىكتە ەكەنىن كورسەتىپ، جاڭا قازاقستاندى بىرگە قۇرايىق! ءبىز بىرگەمىز!، – دەدى اسحات ورالوۆ.

بەيبىت ميتينگكە قاتىسقان ق ر ۇلتتىق عىلىم اكادەمياسىنىڭ اكادەميگى، تاريح عىلىمدارىنىڭ دوكتورى، پروفەسسور حانكەلدى ءابجانوۆ بابالارىمىز بىرلىكتىڭ قۇدىرەتىن، ونى ساقتاۋدىڭ شارتىن وسىدان مىڭ جىل بۇرىن تاسقا جازىپ كەتكەنىن ايتتى.

– كۇلتەگىننىڭ تاسىندا بىلاي دەيدى: «بەكتەرى، حالقى ءتۇزۋ، ادال بولماعاندىقتان، تابعاچ حالقىنىڭ الداۋىنا سەنگەندىكتەن، ارباۋىنا كونگەندىگىنەن، بەكتەرى مەن حالىقتىڭ ىمىراسىزدىعىنان تۇرىك حالقى ەلدىگىنەن، ەلىنەن ايىرىلدى». ەلدىگى دەگەن مەملەكەتتىگى دەگەن ءسوز. ال ەندى وسىنداي امانات قالدىرعان بابالاردىڭ ءداستۇرىن جالعاستىرعان اباي، «بىرلىك مالعا ساتىلسا، ول انتۇرعاننىڭ باسى» دەيدى. كەشەگى قاڭتار قاسىرەتى – سول مالعا، اقشاعا ساتىلعانداردىڭ ءىسى. وندايلارعا قازاقستان، قازاقتىڭ جەرى، ءتىلى كەرەك ەمەس. ولاردىڭ كوزدەگەنى تەك مال، اقشا، بايلىق قانا. ال ءبىزدىڭ ازاتتىعىمىز الەمنىڭ بايلىعىنان دا قىمبات، – دەگەن عالىم قاڭتار وقيعاسىنان ساباق الىپ، قازاقستاننىڭ ءاربىر ازاماتىن وتە ساق، بەلسەندى، ىجداقاتتى جۇمىس ىستەۋگە ۇندەدى.

– كەشەگى پرەزيدەنتىمىزدىڭ جولداۋى – بۇل جاڭا قازاقستاندى قۇرۋدىڭ باعدارلاماسى. مۇنداعى باستامالار، اسىرەسە، ساياسي رەفورمالار قالىڭ قازاقتى، قاراپايىم حالىقتى بيلىككە تارتۋعا، ولاردى بەلسەندى قوعام قۇرۋشىعا اينالدىرۋعا باعىتتالعان. حالىق جۇمىلماي، قازاقستان جاڭا بولا المايدى. حالىق قولداماي، بىردە-بىر باسشىنىڭ جوسپارى جۇزەگە اسپايدى. ءاردايىم ساق بولىپ، الداعى ءىسىمىزدى جاسامپازدىقپەن ساپالى اتقارايىق، – دەدى حانكەلدى ءابجانوۆ.

– مەنىڭ ۇلتىم – ۋكراين، ءبىراق جۇرەگىم قازاق دەپ سوعادى! سەبەبى، مەن وسى ەلدە ءتۋىپ-وستىم، ءبىلىم الدىم، دوستارىمنىڭ بارلىعى دەرلىك قازاقتار، – دەگەن قازاقستان-رەسەي مەديسينالىق ۋنيۆەرسيتەتىنىڭ 2-كۋرس ستۋدەنتى اريانا بەلوبجيسكايا جاستاردى ەڭ الدىمەن مەملەكەت مۇددەسى ءۇشىن قىزمەت ەتۋگە شاقىردى.

ءوز كەزەگىندە، ءماجىلىس دەپۋتاتى ەرلان سايروۆ ەلىمىزدەگى ساياسي رەفورمالاردىڭ وزەكتىلىگى مەن ماڭىزدىلىعىنا توقتالدى.

– ءاربىر قازاقستاندىق داۋىس بەرۋ جانە سايلانۋ قۇقىعىن قولدانا الۋى ءتيىس. دەموكراتياعا، پىكىرلەر پليۋراليزمىنە بالاما جوق. بۇل بۇگىندە بىردەن-بىر ساياسي پروگرەسس جانە ۇلتتىق تۇلەۋ جولى، – دەدى ول.

«قازىرگى تاڭدا بىرلىككە شاقىرۋ پوپۋليزم ەمەس، قاجەتتىلىك». بۇل – ميتينگتە ءسوز العان دەپۋتات ايدوس سارىمنىڭ پىكىرى. ماجىلىسمەن بارلىق قوعامدىق-ساياسي كۇشتەردى ارىپتەستىككە، بىرگە جۇمىس ىستەۋگە، جاڭا قازاقستاندى بىرگە قۇرۋعا ۇندەدى.

حالىقارالىق «قازاق ءتىلى» قوعامىنىڭ ۆيسە-پرەزيدەنتى ماكسيم روجين قازىرگى تاڭدا قازاق ءتىلىن مەڭگەرگەن وزگە ۇلت وكىلدەرىنىڭ، اسىرەسە، جاستاردىڭ سانى ارتا تۇسكەنىن زور ماقتانىشپەن جەتكىزدى.

– مەنىڭ تۋعان ەلىم – قازاقستان. مەن، تاۋەلسىز ەلىمىزدى وركەندەتۋ جولىندا پارتيالاستارمەن بىرگە ۇلەس قوسۋعا قاشان دا دايىنمىن. ءبىزدىڭ باستى قۇندىلىعىمىز – بىرلىگىمىز. سوندىقتان ءبارىمىز بىرگە ەلىمىزدى، جەرىمىزدى، ءتىلىمىزدى، ءدىلىمىزدى، ۇلتتىق قۇندىلىقتارىمىزدى ساقتاۋ ءۇشىن ايانىپ قالمايىق، – دەدى ول.

ال ءماجىلىس دەپۋتاتى ساياسات نۇربەك دەپۋتات رەتىندە وزىنە قاريا كىسىنىڭ بۇگىن عانا ايتقان بەس اماناتىن جەتكىزدى. ولار: مەملەكەت، پرەزيدەنت، ەل مەن جەر، پارتيا جانە جاستار. ول مەملەكەتىمىزدى، پرەزيدەنتىمىزدى، ەلىمىز بەن جەرىمىزدى ساقتاپ، جاستارىمىزدى جاقسى ىستەرگە جۇمىلدىرۋ، وسى باعىتتاعى مەملەكەت باسشىسىنىڭ رەفورمالارىن جۇزەگە اسىرۋعا دايىن بولۋعا شاقىردى.

سونداي-اق، ميتينگتە ءماجىلىس دەپۋتاتتارى جاناربەك ءاشىمجان، دينارا زاكييەۆا، قالالىق ءماسليحات حاتشىسى ستانيسلاۆ كانكۋروۆ، جۋرناليست سەرگەي پونوماريەۆ، كاسىپكەر لاريون ليان، كوپبالالى انا سانا جانداي، ءانشى يبراگيم ەسكەندىر جانە باسقالار ءسوز سويلەدى.