باس پروكۋراتۋرا مەملەكەت جانە قوعام قايراتكەرى زامانبەك ءنۇرقادىلوۆتىڭ قازاسىن تەرگەۋگە بايلانىستى ونىڭ ۇلى قايرات ءنۇرقادىلوۆتىڭ ارىزى قارالىپ جاتقانىن ءمالىم ەتتى.

الايدا ۆەدومستۆو قىلمىستىق ءىستى تەرگەۋ قايتا باستالعانى تۋرالى اقپاراتتى تەرىستەدى. 

بۇعان دەيىن قايرات ءنۇرقادىلوۆ اكەسىنىڭ قازاسىن قايتادان تەرگەۋ ماسەلەسىن كوتەرىپ، باس پروكۋراتۋراعا ارىز جازعانىن ءمالىم ەتكەن. ول اكەسىنىڭ ولىمىنە قاتىستى رەسمي نۇسقامەن ەش كەلىسپەيتىنىن، ونىڭ كىسى قولىنان قازا تاپقانىنا سەنىمدى ەكەنىن ايتقان.

– اكەم قايتىس بولعاندا پوليسيا دەپارتامەنتى ءىس قوزعاپ، مەنى جابىرلەنۋشى رەتىندە قاتىستىردى. دەپارتامەنتكە شاقىرىپ، قىلمىستىق ءىس اياقتالعان سوڭ تەرگەۋ قورىتىندىسىنا ءوزىڭ قول قوياسىڭ دەدى. مەن اكەمدى ولتىرگەنىن ءبىلدىم. دەپارتامەنتتەن شىققانىمدا پالتو كيگەن ەكى جىگىت كۇتىپ الدى. ولاردىڭ ءجاي ادام ەمەس ەكەنىن، ورگاندا ىستەيتىنىن ءتۇسىندىم. كەلدى دە "قايرات، ءوزىن-وزى ءولتىردى دەگەنگە كەلىسەسىڭ" دەدى. كەلىسپەيمىن دەسەم، ولار "سەنى ءولتىرۋ اس ۇيدە ۇشىپ جۇرگەن شىبىندى ولتىرۋدەن دە وڭاي، سەن بىزگە پروبلەما ەمەسسىڭ" دەپ ايتتى، – دەپ اكەسىنىڭ ارتىنان جۇگىرەتىن ادام قالسىن دەگەن نيەتپەن، ەكىنشى جاعىنان بالا-شاعاسىن ويلاپ امالسىز كەلىسكەنىن جەتكىزگەن.