حالىقارالىق مير 24 تەلەارناسى «ەۆرازيا. يستوريا ۋسپەحا» باعدارلاماسىنىڭ كەزەكتى سانىن قازاقستاندىق كاسىپكەر، مەسەنات، "اسىل ادام" قايىرىمدىلىق قورىنىڭ باسشىسى كوڭىلباي شۇكەنوۆكە ارنادى.
مەسەنات سۇحبات بارىسىندا قاراپايىم دانەكەرلەۋشىدەن باستاپ، بۇگىندە ءتۇرلى سالادا بيزنەسى بار تابىستى ادامعا دەيىنگى ءجۇرىپ وتكەن جولى، سول جولدا كەزدەسكەن قيىندىقتاردى قالاي ەڭسەرگەنى تۋرالى ايتادى.
– ۇيدە ءتورت ادامبىز. انام ءبىزدىڭ تاماعىمىز توق، كويلەگىزىم كوك بولۋى ءۇشىن تانىمسىز ەڭبەك ەتتى. بويىمدا تاباندىلىق، تەك العا جۇرەتىن قاسيەت بولسا، وسى انامنان دارىعان شىعار دەپ ويلايمىن. 6-سىنىپتا شىعارما جازدىق. ءبىرى عارىشكەر، ءبىرى دارىگەر، ءبىرى پرەزيدەنت بولعىسى كەلەتىنىن ايتسا، مەن ءجاي عانا ادامدارعا كومەكتەسكىم كەلەتىنى تۋرالى جازدىم. ءبىزدىڭ بالالىق شاعىمىز كەڭەس ۇكىمەتىنىڭ ىدىراعان شاعىمەن تۇسپا-تۇس كەلدى. مەن دانەكەرلەۋشىنىڭ وقۋىنا بارىپ، تىنباي جۇمىس ىستەدىم. ول كەزدە بيزنەسمەن بولامىن دەپ ەمەس، جانباعامىن دەپ جۇمىس ىستەيتىنبىز. ۇيگە نان اكەلۋدىڭ مۇمكىن بولعان بارلىق امالىن جاسايتىنبىز. ءبىر كەزدەرى قالا-قالانى ارالاپ ارماتۋرا، قۇبىرلار، تۇرلى-تەمىر ساتتىق. وزبەكستان شەكاراسىنا دەيىن باراتىنبىز. تاكسيمەن تۇركىستانعا دەيىن بارىپ، اۆتوبۋسقا وتىرامىز. اۆتوبۋستىڭ تومەنگى جاعى تولعان تاۋار، ۇستىنگى بولىگىندە كورپە توسەنىپ ءبىز جاتامىز، – دەيدى بيزنەسمەن كاسىپكەرلىكتەگى العاشقى قادامدارىن ەسكە الىپ.
ونىڭ سوزىنشە، سول كەزدەردە قىمبات سپورتتىق كولىكتەر، جەكە گيدروسيكل، كاتەر تۋرالى ارمانداعان. ال جەزقازعاندا سونىڭ بارىنە قول جەتكىزگەندە مۇنداي جاعداي كوپشىلىكتە جوق بولعاندىقتان، بايلىق رۋحاني ءلاززات سىيلاي المايتىنىن تۇسىنگەن.
– اپتاداعى 7 تاۋلىكتە 24 ساعات بويى جۇمىس ىستەيمىن. سامعاعان، قۇلاعان كەزدەرىمىز بولدى. اكىمشىلىك تاراپىنان كەدەرگى كەلتىرگەندەر، رەيدەرلىك ارەكەت جاساماق بولعاندارمەن ۇشىراستىم. "استانا تريۋمف" ءتۇرعىنۇي كەشەنىن سالعاندا جاڭا كومپانيا اشىپ، ءۇيدىڭ قاسبەتىن جاساۋمەن اينالىستىق. مەنەن تاجىريبەمىز بار-جوعى تۋرالى سۇرادى. مەن تاجىريبەمىز بار ەكەنىن ايتىپ، جاڭا كوماندا قۇرىپ، ينتەرنەتتەن، اننان-مىننان قاراپ، ىزدەنىپ ءجۇرىپ جۇمىسقا كىرىسىپ كەتتىك. بىزدە تاجىريبە جوق ەكەنىن ەشكىم بىلمەي دە قالدى. ءبىز قۇددى ءبارىن بىلەتىندەي جۇمىس ىستەدىك. بيزنەستە كەيدە تاپسىرىس الۋ ءۇشىن قۋلىق جاساۋعا تۋرا كەلەتىن جايتتار بولادى. ەلدى داعدارىس جايلاپ، قارجىلاندىرۋ توقتاپ قالعان كەزدە، مەنىڭ جىگىتتەرىم ءبىر جاعادان باس، ءبىر جەڭنەن قول شىعارىپ، بىرلىك تانىتتى. ماعان اقىرىنا دەيىن سەندى. مەن ولاردىڭ اقىسىن جەمەۋ ءۇشىن قولىمدا باردىڭ ءبارىن بەردىم. ءۇيىمدى، كولىگىمدى ساتتىم. ەسىمدە، ولار جاڭا جىلعا ۇيلەرىنە قۋانىپ قايتتى، سول كەزدە مەنىڭ قالتامدا 200 مىڭ تەڭگە مەن ءرولى وڭ جاقتاعى كولىك قانا قالدى، – دەيدى كاسىپكەر.
كوڭىلباي شۇكەنوۆ 2014 جىلى "اسىل ادام" قايىرىمدىلىق قورىن قۇرادى. قوردىڭ نەگىزگى ماقساتى ازاماتتاردى باسپانا جانە جۇمىسپەن قامتاماسىز ەتۋ. "اسىل ادام" ادامدى تۇرىنە، ۇلتىنا، ءتىلى مەن دىنىنە بولمەيدى. قازاق، ورىس، ۋكراين، پولياك سەكىلدى ۇلتتاردىڭ وكىلدەرى قور تاراپىنان باسپانالى بولىپ جاتقانى سونىڭ ءبىر دالەلى. قوردى قۇرعانداعى ماقسات تا سول "اسىل ادام" – اسىل ادامداردىڭ باسىن قوسادى.
"مەملەكەتتىك قولداۋعا ىلىگۋدىڭ بىردەن-بىر شارتى ادام باقىتسىز بولۋى كەرەك، ال ءبىز ادامداردى باقىتتى قىلعىمىز كەلەدى" دەگەن كاسىپكەر قور تاراپىنان تەگىن ءۇي الۋ ءۇشىن باسپاناعا مۇقتاجدىعىن دالەلدەۋ جەتكىلىكتى دەيدى.
قور قۇرىلعان 8 جىلدا 40 كوپبالالى شاڭىراقتى ۇيمەن قامتاماسىز ەتكەن.
كوڭىلباي شۇكەنوۆ بۇگىندە ۆارەنيك پەن ساعات ساتۋدان باستاپ، كيىم-كەشەك ءوندىرىسى، ەليتالىق ساناتتاعى جىلجىمايتىن مۇلىك ساتۋعا دەيىنگى كوپتەگەن سالالارمەن اينالىسادى. بۇلاردان بولەك الەۋمەتتىك جوبالارمەن، اۋىل شارۋاشىلىعى كووپەراتيۆىمەن شۇعىلدانادى. ول بۇل جوبانى قۇرعان ءوزى بولعانىمەن، يەسى حالىق ەكەنىن، "مەن جاسادىم دەپ ەمەس، ءبىز جاسادىق" دەگەندى اۋزىنان تاستامايتىنىن، بۇگىندە وعان 50 مىڭ ادام سەنىم ارتىپ جۇمىس ىستەپ جاتقانىن ايتادى.
قازىرگى تاڭدا كوڭىلباي شۇكەنوۆ كومپانيالارىنىڭ بولىمشەلەرى قازاقستاننىڭ بارلىق ءىرى قالالارىندا بار. ودان بولەك وزبەكستان، جۇڭگو، تۇركيا، رەسەي ەلدەرىمەن سەرىكتەستىك ورناتقان. جاقىندا كاسىپتى كەڭەيتىپ دۋباي نارىعىنا شىعۋدى جوسپارلاپ وتىر.
بيزنەسمەننىڭ باستى ۇستانىمى: ماڭىزدىسى – اقشا ەمەس، اقشا تەك قاجەتتى قۇرال عانا، ماڭىزدىسى – جاساعان ءىسىڭ، ادامعا پايدالى بولۋ، كوپكە كومەكتەسۋ.
كوڭىلباي شۇكەنوۆ كاسىپتى جاڭا باستاپ جاتقاندارعا ارمانداي ءبىلىڭىز، ارمانىڭىزعا سەنىپ، تىنىمسىز ەڭبەك ەتىڭىز دەپ كەڭەس بەرەدى.
پىكىر قالدىرۋ