قازاقستاننىڭ سولتۇستىگىندەگى  پەتروپاۆل، پاۆلودار قالالارىنىڭ اتىن اۋىستىرۋ باستاماسى كوتەرىلىپ، پەتيسيا ىسكە قوسىلدى. پەتيسيا اۆتورى اسلان ابدۋللا. وعان قازىرگى ۋاقىتتا 20 مىڭعا جۋىق قول جينالعان. ونىڭ 13 مىڭنان استامى باستامانى قولداسا، 6500-دەن استامى قارسى شىققان. اۆتور 100 مىڭ قولداۋشى جيناۋدى جوسپارلاپ وتىر.

ماسەلەنى پرەزيدەنت قانا شەشە الادى دەگەن اۆتور پەتروپاۆلدى قىزىلجار، پاۆلوداردى ەرتىس دەپ اتاۋ كەرەكتىگىن ايتادى.

سونداي-اق ول ۇسىنىلىپ وتىرعان اتاۋلار ەل اراسىندا بۇرىننان بارىن اتاپ ءوتىپ، اتاۋدىڭ قوس قالاعا قاتىسىن تاريحي تۇرعىدا قىسقاشا ءتۇسىندىرىپ وتكەن.

"QYZYLZHAR - "قىزىلجار كوپ قازاققا ارمان جەرسىڭ، كەرەيدە تولىباي سىنشى تۋىن تىگىپ، اتىڭدى "قىزىلجار" دەپ بابام قويعان" دەگەن ولەڭ شۋماقتارى بار. ال تولىباي سىنشى حVءىى عاسىردا ءومىر سۇرگەن ادام. بەرتىنىرەك قىزىلجار قونىسىن اتىعايدىڭ داۋلەتالى دەگەن بايى مەكەن ەتكەنىن ءسابيت مۇقانوۆ جازدى. "اۋليە پەتر" (پەتروپاۆلدىڭ العاشقى اتاۋى) قورعانى بولسا تەك حVءىىى عاسىردىڭ ەكىنشى جارتىسىندا سالىنا باستاپ، 1770 جىلى عانا اياقتالعان. سول سەبەپتى بۇل جەردە جەر اتاۋى بولماعان دەگەن شىندىققا جاناسپايدى.

ERTIS – "Jebe" قوعامدىق بىرلەستىگى پاۆلودار قالاسىنىڭ اتاۋىن ەرتىس دەپ وزگەرۋىن ۇسىنىپ وتىر. بۇرىننان كوشپەلى قازاق پاۆلودار وبلىسىن ەرتىس-بايان ءوڭىرى دەپ اتاپ كەلگەن. قازىرگى تاڭدا قالادا سول اتاۋدى جاڭعىرتۋدا. اقپاراتتىق حولدينگ "ەرتىس-مەديا" وبلىستىق "ەرتىس" تەلەارناسى جانە وليمپيادالىق باسسەينمەن زاماناۋي مۋلتيمەديالىق مۋزەي "ەرتىس" اتالادى" دەيدى پەتيسيا اۆتورى.

ەل اراسىندا قوس قالانىڭ اتاۋىن قازاقشالاۋ تۋرالى اڭگىمە تاۋەلسىزدىك العاننان بەرى كوتەرىلىپ كەلەدى. الايدا بيلىك وسى ۋاقىتقا دەيىن ماسەلەنى كۇن تارتىبىنە قويماعان. مۇنى اتالعان وڭىرلەردەگى ۇلتتىق قۇرامنىڭ ءارتۇرلى بولۋى باستاماعا قارسى رەاكسيا تۋدىرۋى مۇمكىن، ماسەلە ۇلتارالىق سيپات الىپ كەتۋى ىقتيمال دەگەن ساقتىق شاراسىمەن تۇسىندىرىندەر، رەسەي ىقپالىمەن بايلانىستىراتىندار بار. ۇلتتىق قۇرامنىڭ ارتۇرلىلىگىنەن باستامانى قولداۋشىلارمەن قاتار، وعان قارسى شىعاتىندار دا كوپ بولۋى عاجاپ ەمەس.