ۋكراينانىڭ باس شتابى 24 اقپاننان بەرى مەرت بولعان، جارالانعان رەسەي اسكەرىنىڭ سانى 19 مىڭنان اساتىنىن ءمالىم ەتتى. بۇدان بولەك رەسەيدىڭ اسكەري شىعىنى 725 تانك، 1923 اسكەري كولىك، 347 ارتيللەريالىق جۇيە، 154 ۇشاق، 137 تىك ۇشاق، 7 كەمەنى قۇرايدى. ۋكرايناداعى جاعدايعا بايلانىستى بۇدان وزگە ماڭىزدى اقپاراتتار جيىنتىعى تومەندە ۇسىنىلىپ وتىر.

♦ رەسەي قورعانىس مينيسترلىگى ۋكراينادا 78 اسكەر نىساننىڭ، ۋكرايناعا ەۋروپا ەلدەرىنىڭ ءبىرى بەرگەن ءتورت س-300 زىمىران كەشەنىنىڭ كوزى جويىلعانىن ءمالىم ەتتى؛

♦ ۇلىبريتانيانىڭ پرەمەر-مينيسترى بوريس دجونسون ۋكرايناعا جاساعان ساپارىندا لوندون كييەۆكە قوسىمشا 120 برونوتەحنيكا مەن كەمەگە قارسى زىمىران جۇيەسىن جىبەرەتىنىن جەتكىزدى؛

♦ ۋكراينا باس پروكۋرورى كييەۆ وبلىسىندا 1200-دەن اسا ادامنىڭ دەنەسى تابىلعانىن حابارلادى. رەسەيدىڭ كييەۆ وبلىسىنا باسقىنشىلىعىنان كەلگەن ادام شىعىنى مۇنىمەن بىتپەۋى مۇمكىن. بۋزوۆايا ەلدىمەكەنىندە ونداعان جەرگىلىكتى تۇرعىن ءبىر جەرگە كومىلگەنى بەلگىلى بولدى. ۋكراينا بيلىگى اسكەري قىلمىس دەرەگى بويىنشا 5600 ءىس اشقان. رەسەي بيلىگى بەيبىت تۇرعىنداردى جاپپاي ءولتىرۋ دەرەكتەرىن جوققا شىعارادى؛

♦ پرەزيدەنت ۆلاديمير زەلەنسكيي رەسەي ەلدىڭ شىعىسىنا ۇلكەن اۋقىمدى ۇرىستار جوسپارلاپ وتىرعانىن ەسكەرتتى؛

♦ رەسەيدىڭ ۋكرايناعا قارسى اگرەسسياسىنان كەيىن فينليانديا مەن شۆەسيا ناتو-عا وسى جازدا مۇشە اتانۋى مۇمكىن ەكەنى تۋرالى حابارلاندى. ەگەر جوسپار جۇزەگە اسسا، فينليانديا ناتو ەلدەرى اراسىندا رەسەيمەن شەكاراسى ەڭ ۇزاق (1340 كم) ەلگە اينالادى. شەكارا رەسەيدىڭ ءىرى قالاسى سانكت-پەتەربۋرگتەن 200 شاقىرىم جەردە جاتىر. اتالعان ەل قىرعي-قاباق سوعىسى كەزىندە دە كسرو-مەن دوستىق نەيتراليتەتىن بەرىك ۇستانعان. ال شۆەسيا 200 جىلدان استام ۋاقىت ەشقانداي اسكەري وداققا قوسىلماعان. ەندى مىنە، رەسەي ۋكرايناعا سوعىس اشقالى ەكى ەل دە جەدەل تۇردە ناتو اليانسىنا وتۋگە اسىعىپ وتىر.