باس پروكۋراتۋرانىڭ ءبىرىنشى قىزمەت باستىعىنىڭ ورىنباسارى ەلدوس قيلىمجانوۆ ورتالىق كوممۋنيكاسيالار قىزمەتىندە وتكەن بريفينگتە قاڭتار وقيعاسىنا بايلانىستى تەرگەۋ جۇمىستارىنىڭ بارىسى تۋرالى حابارلادى.

ونىڭ سوزىنشە، تارتىپسىزدىكتەرگە 12 ۇيىمداسقان قىلمىستىق توپتىڭ قاتىسقانى انىقتالعان.

– ولاردىڭ ىشىندە ىشىندە ەڭ بەلسەندىلەرى – "ديكيي ارماننىڭ" توبى، "قازاقستاندىقتار" جانە "ايشۋاق-جانتۇگەل" توپتارى. ۇيىمداسقان قىلمىستىق توپتىڭ 23 مۇشەسى قاماۋعا الىندى. ولاردىڭ ىشىندە 4 قىلمىس اۆتوريتەتى بار. بۇل قىلمىستاردى ۇيىمداستىرۋشىلار مەن قاتىسۋشىلاردى انىقتاۋ جانە جاۋاپقا تارتۋ ءۇشىن بارلىق قاجەتتى شارالار قابىلدانۋدا. بۇگىنگى تاڭدا جاپپاي تارتىپسىزدىكتى ۇيىمداستىرۋ جانە قاتىسۋ بويىنشا 547 ادام كۇدىكتى رەتىندە تانىلىپ، ولاردىڭ 269-ى قاماۋعا، – دەدى ەلدوس قيلىمجانوۆ.

ول قاڭتار وقيعاسى كەزىندەگى اۋەجايعا، پوليسيا دەپارتامەنتىنە، "قازاەروناۆيگاسيا" عيماراتىنا جاسالعان شابۋىل، الماتى قالاسى اكىمدىگىنىڭ الدىندا ۇيىمداستىرىلعان تارتىپسىزدىكتەر سەكىلدى جەكەلەگەن وقيعالارعا بايلانىستى بايانداما جاسادى.

سونداي-اق الماتى، جامبىل جانە قىزىلوردا وبلىستارى ۇلتتىق قاۋىپسىزدىك كوميتەتى جانە پوليسيا دەپارتامەنتتەرىن، الماتى اۋەجايىنىڭ عيماراتىن تاستاپ كەتۋ فاكتىلەرى بويىنشا تەرگەۋ جالعاسىپ جاتقانىن جەتكىزدى.