– ەڭ الدىمەن، مەن ۆاينەرلەر، بلوگەرلەر دەپ اتالاتىندار تۋرالى ايتقىم كەلەدى. ولار باسقا ازاماتتارمەن قاتار قولدانىستاعى كونستيتۋسياعا ساي تەڭ قۇقىقتارى مەن مىندەتتەرى بار قاراپايىم ادامدار. قىلمىستىق قۋدالاۋ ورگاندارى ءۇشىن ولاردىڭ ەشقانداي ايىرماشىلىعى جوق، مارتەبەسى نەمەسە جۇمىس ورنىنىڭ بولۋى ماڭىزدى ەمەس. ايتايىن دەگەنىم، وزدەرىن ۆاينەر اتاپ جۇرگەندەر (ۇشەۋ) قىلمىستىق جاۋاپكەرشىلىككە تارتىلادى، – دەدى ق ر ءىىم تەرگەۋ دەپارتامەنتىنىڭ باستىعى سانجار ءادىلوۆ.
قازاقستاندىق ءۇش ۆاينەر قارجى پيراميداسىن قۇردى جانە وعان باسشىلىق ەتتى دەپ ايىپتالىپ وتىر. تورەبايەۆ پەن شەرنيازوۆ 1000 اەك مولشەرىندە (3 063 000 تەنگە) كەپىل وتەپ بوساتىلسا، سايدبايەۆقا ىزدەۋ جاريالانعان.
سانجار ءادىلوۆتىڭ ايتۋىنشا، ۆاينەرلەردىڭ ەكەۋىنە قاتىستى پروكۋروردىڭ ۇسىنىسى بويىنشا سوت كەپىل تۇرىندەگى بۇلتارتپاۋ شاراسىن تاڭداعان. ال ءۇشىنشى ۆاينەر سايدبايەۆ سوتقا دەيىنگى تەرگەپ-تەكسەرۋ بارىسىندا قاشىپ كەتكەن.
– بۇگىندە سوتتىڭ سانكسياسىمەن ول سىرتتاي قاماۋعا الىنىپ، حالىقارالىق ىزدەۋ جاريالاندى، ونىڭ جۇرگەن جەرىن انىقتاۋ جانە قاماۋعا الۋ شارالارى جۇرگىزىلىپ جاتىر، – دەدى سانجار ءادىلوۆ.
تەرگەۋ دەپارتامەنتىنىڭ باسشىسى، بۇگىنگى تاڭدا قۇزىرلى ورگاندار Mudarabah Capital-عا قاتىستى جەتكىلىكتى ايعاق جيناعانىن اتاپ ءوتتى. زارداپ شەككەندەرگە كەلتىرىلگەن ماتەريالدىق شىعىندى وتەۋ ماقساتىندا تەرگەۋشىلەر الماتى، نۇر-سۇلتان جانە الماتى وبلىسىندا ورنالاسقان مۇلىكتەردى تاركىلەدى: ءتورت جەر تەلىمى، 10 پاتەر، بەس ءۇي، ەكى كولىك، ءبىر دۇكەن.
سونىمەن قاتار، وسى ىسكە قاتىستى اقشا دا تاركىلەنىپ، ءقازىر قاماۋعا الىنعان مۇلىكتى باعالاۋ جۇمىستارى جۇرگىزىلىپ جاتىر.
پىكىر قالدىرۋ