بۇرىن نەگىزىنەن ورىسشا سويلەيتىندەر انا تىلىنە كوبىرەك كوشىپ، وزگەلەردى سولاي ىستەۋگە ۇندەيتىن بولعان. ءتىپتى لۆوۆ قالاسىنىڭ ورتالىعىنداعى رەستورانداردىڭ بىرىندە "قىمباتتى ۋكراين حالقى! ءبىز ۋكراين جەرىندە ءومىر ءسۇرىپ، ۋكراين نانىن جەپ وتىرمىز. ولاي بولسا، وككۋپانتتىڭ تىلىندە ەمەس، ۋكراين تىلىندە سويلەيىك. ۋكراينا جاساسىن، ۋكراين قارۋلى كۇشتەرى جاساسىن" دەپ جازىلعان تاقتايشا ءىلۋلى تۇر.

جۋىردا ۋكراينا پرەزيدەنتى ۆلاديمير زەلەنسكيي رەسەيدىڭ ءوزى ۋكراينا اۋماعىندا دەرۋسيفيكاسيا ءجۇرۋى ءۇشىن ءبارىن جاساپ جاتقانىن، بۇل – رەسەيدىڭ ءوزىن كورگە تىعاتىن ساياساتىنىڭ ءبىر كورىنىسى ەكەنىن ءمالىم ەتكەن.

ناۋرىزداعى زەرتتەۋ ناتيجەسىندە ۋكرايندىقتاردىڭ 76 پايىزى ۋكراين ءتىلىن ءوزىنىڭ انا ءتىلى دەپ ەسەپتەيتىنى (ون جىل بۇرىن بۇل كورسەتكىش 57 پايىز بولعان)، سۇرالعانداردىڭ 83 پايىزى ۋكراين ءتىلى ەلدەگى جالعىز مەملەكەتتىك ءتىل بولۋى كەرەك سانايتىنى بەلگىلى بولعان.

ساۋالنامانى جۇرگىزگەن "رەيتينگ" الەۋمەتتىك قىزمەت ديرەكتورى الەكسەي انتيپوۆيچ ۋكرايندىقتاردىڭ انا تىلىنە قاراي بەتبۇرىسى سوڭعى ايداعى فەنومەن ەمەستىگىن ايتادى.

ونىڭ سوزىنشە، 2005 جىلى ۆيكتور يۋششەنكو پرەزيدەنتتىككە كەلگەندە ونىڭ وپپونەنتتەرى ەندى "ۋكراينيزاسيا كۇشتەپ جۇرگىزىلەدى" دەي باستاعان. ونىڭ تۇسىندا ۋكراين ءتىلى مەن مادەنيەتىن قولداۋعا ارنالعان كەيبىر ارەكەتتەر شىنىمەن دە جاسالعان. الايدا بۇل ورىس ءتىلىنىڭ قولدانىس اياسىن كەڭەيتۋدى قالايتىنداردى بىرىكتىرە تۇسكەن. 2010 جىلى بيلىككە پرورەسەيلىك ۆيكتور يانۋكوۆيچ كەلگەندە ەل باعىتى قاي جاققا قاراي ويىسىپ بارا جاتقانىن بايقاعان ۋكرايندىقتار انا تىلىندە كوبىرەك سويلەي باستاپ، 2012 جىلى ۋكراين ءتىلىن انا ءتىلى دەپ ەسەپتەيتىندەر سانى 5 پايىزعا ارتقان.

2014 جىلى يانۋكوۆيچتىڭ ەلدەن كەتۋى، قىرىم اننەكسياسى، دونباسستاعى كونفليكت كەزىندە جوعارىداعى سيفر ۋكراين ءتىلىنىڭ پايداسىنا قاراي تاعى 10 پايىزعا ارتقان. وعان ءبىر جاعىنان قاراپايىم اريفمەتيكا دا سەبەپ بولعان. ويتكەنى قىرىمدا تۇراتىن ەكى ميلليون، دونباسستاعى ءۇش ميلليون ءورىستىلدى ادام ۋكراينادان ءبولىنىپ قالدى.

ودان بولەك، ۋكراين بيلىگى ۋكراين ءتىلىن قولدايتىن ءبىرقاتار زاڭ قابىلداعان. وعان ساي، ۋكراين ءتىلى ءبىلىم، جارناما، باسپا، قىزمەت كورسەتۋ تىلىنە اينالا باستادى.

زەلەنسكييدىڭ تۇسىندا ءتىل ساياساتىنا وزگەرىس ەنگىزىلمەگەندىكتەن، جۇمساق ۋكراينيزاسيا جالعاسا بەرگەن.

– سوڭعى ءبىرجارىم ايداعى جاعداي ازاماتتاردى ۋكراين ءتىلى جالعىز مەملەكەتتىك ءتىل بولۋعا ءتيىس دەگەن وي توڭىرەگىنە توپتاستىرا ءتۇستى. ءتىپتى بۇنداي كوزقاراس ەلدىڭ شىعىسىندا دا باسىم. جۋىق ارالىقتا ءبىر تىلگە كوشۋ نيەتىن ءورىستىلدى ۋكرايندىقتاردىڭ ۇشتەن ءبىرى، ءقوستىلدى ازاماتتاردىڭ ۇشتەن ەكىسى قولداپ وتىر، – دەيدى الەۋمەتتانۋشى.

دەرەككوز: ۆۆس