11 ءساۋىر كۇنى ىسكە قوسىلعان "ۇيعىر اۋدانىنىڭ اتاۋى شارىن نەمەسە قارادالا اۋدانى دەپ وزگەرتىلسىن" دەگەن پەتيسياعا بۇگىندە 115 مىڭنان استام قول جينالعان. ونىڭ 109 مىڭعا جۋىعى باستامانى قولداسا، 6 مىڭنان استامى قارسى شىققان.
پەتيسيا اۆتورى باستاما جوق جەردەن جاۋ ىزدەگۋ ەمەس، ءماجىلىس دەپۋتاتى باقىتبەك سماعۇل ۇيعىر اۋدانىنىڭ اتاۋىن قارادالا نەمەسە شارىن دەپ وزگەرتۋگە ۇسىنىس جاساعانىن ايتادى.
"بۇل ماسەلە كوپ جىلدان بەرى تالقىلانىپ كەلەدى. قوعام بەلسەندىلەرى بىرنەشە رەت حات جازعان. بۇقارالىق اقپارات قۇرالدارىندا قانشاما ماقالالار جاريالاندى. حالىق "بۇل ەسكى ماسەلە جاڭا قازاقستانعا اۋىسا ما؟" دەپ ءجيى سۇرايدى" دەيدى دەپۋتات.
اۋدان اتاۋىن "قارادالا" نەمەسە "شارىن" دەپ وزگەرتۋ كەرەك. نەگە شارىن؟ ويتكەنى بۇل ايماقتا شارىن وزەنى اعىپ جاتىر جانە شارىن شاتقالى ورنالاسقان.
ءبىز، قازاقستان حالقى ۇيعىر اۋدانىنىڭ اتاۋى شارىن نەمەسە قارادالا اۋدانى دەپ وزگەرتىلسىن دەپ تالاپ ەتەمىز!" دەلىنگەن پەتيسيا ماتىنىندە.
اۋدان اتىن اۋىستىرۋ ماسەلەسى تالاي جىلدان بەرى دۇركىن-دۇركىن كوتەرىلىپ كەلە جاتىر. قازاق پەن ۇيعىر ۇلتى قونىس تەپكەن اۋداندا سوڭعى جىلدارى بىرنەشە ەتنوسارالىق جانجال تۋعان. سوڭعى كيكىلجىڭ 2020 جىلعى ماۋسىمدا بولىپ، اۋدانعا الماتى وبلىسىنىڭ سول كەزدەگى اكىمى اماندىق باتالوۆ كەلگەن. ەكس-اكىمگە اۋىل حالقى اۋدان اتىن اۋىستىرۋ تۋرالى تىلەگىن جەتكىزگەن. باتالوۆ ماسەلەنى جوعارىعا ايتامىن دەپ كەتكەنىمەن، ماسەلە وزگەرىسسىز قالدى.
جەرگىلىكتى قازاقتار اۋدان اتىن اۋىستىرۋ قوس ەتنوستى بولەكتەمەيدى، كەرىسىنشە، بىرىكتىرەدى، قازاقستان حالقى دەگەن تۇسىنىك اينالاسىنا توپتاستىرادى دەيدى. ال ۇيعىر ەتنوسىنىڭ كەي وكىلدەرى اۋدان اتىن اۋىستىرۋعا قارسى ەمەستىگىن جەتكىزگە، كەيبىرى وسىلاي قالا بەرگەنىن قالايدى.
پىكىر قالدىرۋ