الماتىدا كەنجەعالي ساعادييەۆ اتىنداعى حالىقارالىق بيزنەس ۋنيۆەرسيتەتىندە "ساعادييەۆ وقۋلارى 2022 – قر-نىڭ جاڭا ەكونوميكالىق ساياساتى: بۇگىنى مەن پەرسپەكتيۆاسى" تاقىرىبىندا حالىقارالىق-عىلىمي كونفەرەنسيا جۇمىسىن باستادى.

وعان شەتەلدىك جانە وتاندىق عالىمدار، پروفەسسورلار، جوو وقىتۋشىلارى، دوكتورانتتار، ماگيسترانتتار قاتىسىپ جاتىر. 

عىلىمي كونفەرەنسيا كەنجەعالي ساعادييەۆ اتىنداعى حالىقارالىق بيزنەس ۋنيۆەرسيتەتىنىڭ رەكتورى انار ماحمەتوۆانىڭ قۇتتىقتاۋ سوزىمەن باستالدى. انار ماحمەتوۆا كونفەرەنسيا تالقىلاۋلارىنىڭ بارىسىندا تۇيىندەلگەن ۇسىنىستار ەل ەكونوميكاسىنىڭ وسىپ-وركەندەۋىنە، وتاندىق ءونىمدى ءتيىمدى پايدالانۋ جولىندا كادەگە اساتىنىنا سەنىم ءبىلدىردى.

پلەنارلىق وتىرىستا "ەكونوميكالىق-ساياسي داعدارىس جاعدايىندا قازاقستاننىڭ ەكونوميكالىق قاۋىپسىزدىگىن قامتاماسىز ەتۋ جولدارى" تاقىرىبىندا بايانداما جاساعان ءبىلىم جانە عىلىم مينيسترلىگى ەكونوميكا ينستيتۋتى باسشىسىنىڭ كەڭەسشىسى نايليا نۇرلانوۆا قازاقستانداعى ەكونوميكالىق قاۋىپسىزدىك ماسەلەسىندەگى نەگىزگى پروبلەمالاردى اتادى.

عالىم ولاردىڭ قاتارىنا شيكىزات پەن ونىڭ الەمدىك نارىقتاعى سۇرانىسىنا دەگەن تاۋەلدىلىكتى، جوعارى تەحنولوگيالىق ءوندىرىس ۇلەسىنىڭ تومەندىگىن، الەمدىك نارىقتا باسەكەلەسە الاتىن تاۋارلاردى وندىرەتىن سالالاردىڭ كەنجەلەۋىن، مەملەكەتتىك باسقارۋداعى بيۋروكراتيزاسيا مەن جەمقورلىقتى جانە وندىرىستىك، كولىك-لوگيستيكالىق، الەۋمەتتىك، كوممۋنالدىق ينفراقۇرىلىمنىڭ جەتكىلىكتى دامىماۋىن جاتقىزادى.

ساراپشى ەكونوميكالىق قاۋىپسىزدىكتى كۇشەيتۋ ءۇشىن ونىڭ قۇرامداس بولىكتەرىنىڭ ءبىرى  –تەحنولوگيالىق قاۋىپسىزدىكتى دامىتۋعا باسىمدىق بەرۋ كەرەكتىگىن اتاپ ءوتتى. ول ءۇشىن تومەندەگىدەي ۇسىنىستار ءبىلدىردى:

♦ ءداستۇرلى سالالارداعى تەحنولوگيالىق مودەرنيزاسيا باعىتىن كەڭەيتۋ؛

♦ عىلىمعا نەگىزدەلگەن كۇردەلى جوعارى تەحنولوگيالىق ءونىم شىعاراتىن وندىرىستەردى قۇرۋ؛

♦ ءىت قىزمەت سالاسىن دامىتۋ؛

♦ 2050 جىلعا دەيىن عالىمعا بولىنەتىن بيۋدجەت قاراجاتىن بىرتىندەپ ۇلعايتۋ. قارجىلاندىرۋ كولەمىن ءججى-نىڭ  0،5 پايىزىنا، بيۋدجەتتىڭ 1،7 پايىزىنا دەيىن جەتكىزۋ؛

♦عىلىمدى ۇيىمداستىرۋ مەن باسقارۋعا، ونىڭ ينفراقۇرىلىمدىق دامۋىنا، قارجىلاندىرۋدىڭ اشىقتىعىنا، عىلىمنىڭ كادرلىق پوتەنسيالىن ارتتىرۋعا، عالىم ماماندىعىنىڭ مارتەبەسىن كوتەرۋگە جاڭاشا كوزقاراس قالىپتاستىرۋ؛

♦ عىلىمي كادرلاردى دايارلاۋدا عىلىمي-زەرتتەۋ ينستيتۋتىنىڭ قۇقىعىن كەڭەيتۋ.

پلەنارلىق وتىرىس بارىسىندا وزگە دە عالىمدار بايانداما جاسايدى. ولاردىڭ اراسىندا حالىق فيناستىڭ باسقارما باسشىسى فارحاد وحونوۆ، IQAA اگەنتتىگى اككرەديتاسيا كەڭەسىنىڭ اكادەميگى گەنناديي گامارنيك، Management and Statistics of Forlì Bologna ۋنيۆەرسيتەتىنىڭ (يتاليا) پروفەسسورى Massimo Bianchi، نارحوح ۋنيۆەرسيتەتى اكادەميالىق كەڭەسى ءتوراعاسىنىڭ ورىنباسارى ساماجان ءومىرزاقوۆ، قازاقستان عالىمدارى وداعىنىڭ پرەزيدەنتى ورازالى سابدەن، تۇڭعىش پرەزيدەنت قورى جانىنداعى الەمدىك ەكونوميكا جانە ساياسات ينستيتۋتىنىڭ كەڭەسشىسى ماگبات سپانوۆ بار.

كونفەرەنسيا جۇمىسى بۇگىن ەكى سەكسيا، ەرتەڭ بەس سەكسيا بويىنشا جالعاسىپ، 22 ءساۋىر كۇنى دوڭگەلەك ۇستەلمەن تۇيىندەلەدى.