ءماجىلىس "قازاقستان رەسپۋبليكاسىنىڭ كەيبىر زاڭنامالىق اكتىلەرىنە بالانىڭ قۇقىقتارىن قورعاۋ، ءبىلىم بەرۋ، اقپارات جانە اقپاراتتاندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭ جوباسىنا سەنات ەنگىزگەن تۇزەتۋلەردى ماقۇلدادى.
سەنات تۇزەتۋلەرىن ءماجىلىستىڭ جالپى وتىرىسىنا قاتىسقان 101 دەپۋتاتتىڭ ءجۇزى قولداسا، ءبىر دەپۋتات قالىس قالدى. زاڭ پرەزيدەنتتىڭ قول قويۋىنا جىبەرىلدى.
زاڭ جوباسىنداعى داۋلى تۇزەتۋلەردى ەنگىزۋمەن دەپۋتاتتار ايدوس سارىم مەن دينارا زاكييەۆا اينالىسقان.
بۇعان دەيىن سەنات زاڭ جوباسىن قاراۋ بارىسىندا جوباداعى قوعامدا نارازىلىق تۋدىرعان الەۋمەتتىك جەلىلەر مەن مەسسەندجەرلەردىڭ جۇمىسى شەكتەۋگە قاتىستى نورمالاردى الىپ تاستاعان. جوعارى پالاتا دەپۋتاتتارى اقپارات جانە قوعامدىق دامۋ مينيسترلىگىنە بالاعا قاتىستى كيبەربۋلينگ دەپ تانىلعان اقپاراتتى جويۋعا عانا قۇزىرەت قالدىرىپ، ينتەرنەت-رەسۋرستاردىڭ، الەۋمەتتىك جەلىلەر مەن مەسسەندجەرلەردىڭ جۇمىسىن شەكتەۋگە نەمەسە توقتاتۋعا قاتىستى وكىلەتىن قىسقارتتى.
زاڭ جوباسىنىڭ ءماجىلىس ماقۇلداعان العاشقى رەداكسياسىندا الەۋمەتتىك جەلىلەر مەن مەسسەندجەرلەردى قازاقستاندا "زاڭدى وكىلدەرىن" تاعايىنداۋعا، سونىمەن قاتار، اقپارات جانە قوعامدىق دامۋ مينيسترلىگى تالاپ ەتكەن كونتەنتتى 24 ساعاتتىڭ ىشىندە وشىرۋگە مىندەتتەيتىن تۇس بولعان. ەگەر الەۋمەتتىك جەلى ۋاكىلەتتى ورگان تالابىن ورىنداماسا، مينيسترلىك جەلىنىڭ "قازاقستان اۋماعىندا جۇمىسىن شەكتەۋگە" قۇقىلى.
زاڭ جوباسىنداعى وسى تۇزەتۋلەر مەدياساراپشىلار اراسىندا قىزۋ تالقىلانىپ، ولاردىڭ نارازىلىعىن تۋدىرعان. ولاردىڭ سوزىنشە، مينيسترلىككە بەرۋ كوزدەلگەن قۇزىرەت Facebook، Instagram، Youtube، Telegram، Whatsapp جانە باسقا دا جەلىلەردىڭ قازاقستان ينتەرنەت كەڭىستىگىندە جۇمىس ىستەۋىنە ءقاۋىپ توندىرگەن.
پىكىر قالدىرۋ