پاۆلودار وبلىسى بويىنشا سىبايلاس جەمقورلىققا قارسى قىزمەتى پاۆلودار وبلىسى پوليسيا دەپارتامەنتىنىڭ ەكس-باستىعى پوليسيا گەنەرال-مايورى نۇرلان ماسىموۆكە قاتىستى اسا ءىرى مولشەردە پارا الدى دەگەن كۇدىكپەن سوتقا دەيىنگى تەرگەۋدى باستادى.
"وسى فاكتى بويىنشا ونىڭ ىس-ارەكەتى سىرتتاي سارالانىپ، تەرگەۋ سوتى "كۇزەتپەن ۇستاۋ" تۇرىندەگى بۇلتارتپاۋ شاراسىمەن سانكسيالادى. قازىرگى ۋاقىتتا ن.م. ماسىموۆكە ىزدەۋ جاريالاندى، ءىس بويىنشا ونىڭ ورنالاسقان جەرىن انىقتاۋ بويىنشا قاجەتتى جەدەل-ىزدەستىرۋ ءىس-شارالارى جانە ءىستىڭ بارلىق ءمان-جايلارىن انىقتاۋعا باعىتتالعان باسقا دا تەرگەۋ ىس-ارەكەتتەرى جۇرگىزىلۋدە. تەرگەۋ ناتيجەلەرى بويىنشا ءتيىستى ءىس جۇرگىزۋ شەشىمى قابىلداناتىن بولادى" دەلىنگەن انتيكور حابارلاماسىندا.
نۇرلان ءماسىموۆ ۇلتتىق قاۋىپسىزدىك كوميتەتىنىڭ بۇرىنعى ءتوراعاسى كارىم ءماسىموۆتىڭ جاقىن تۋىسى. ءماسىموۆتىڭ ءوزى مەملەكەتكە وپاسىزدىق جاسادى دەگەن، سونداي-اق تاعى 4 باپ بويىنشا كۇدىككە ءىلىنىپ، تەرگەلىپ جاتىر.
پىكىر قالدىرۋ