بۇگىن وتىز كۇن بويى ورازا تۇتقان الماتى جاماعاتى ورازا ايت نامازىن وقۋعا جينالدى. ەكى جىل ايت نامازىن وقي الماعان قالا جۇرتشىلىعى ورتالىق مەشىتتىڭ ءىشى مەن سىرتىنا لىق تولدى.

شاھاردىڭ باس يمامى تولەبي ءدادىل ۇلى ايت مەرەكەسىنە جينالعان جاماعاتقا ورازا ايتتى تويلاۋدىڭ ءتارتىبى مەن ءمانى مەن ماڭىزدىلىعى تۋراسىندا ۋاعىز ايتتى.

«ورازا ايت مەيرامى – ادامداردىڭ كوڭىلىنە قۋانىش سىيلاپ، جانىن جادىراتاتىن ۇلىق مەرەكە. ءاسىلى، ورازا ايت قاسيەتتى رامازان ايى اياقتالعانىنىڭ بەلگىسى عانا ەمەس، ول – ءبىر ايلىق قۇلشىلىعىمىزدىڭ قۋانىشى مەن جەمىسى. بۇل – ارازداسقان ادامدار تاتۋلاسىپ، تۋىسقاندىق بايلانىستى كۇشەيتەتىن مەيرام. اللا تاعالا قۇراندا: «سەن كەشىرىم جولىن ۇستان، جاقسىلىققا بۇيىر، ناداندىقتان بەت بۇر»، - دەپ (اعراف، 199) مۇسىلمانداردى بارىنشا كەشىرىمدى بولۋعا شاقىرعان. سول سەبەپتى، رەنجىسىپ قالعان كىسىلەرمەن تاتۋلاسۋ، قاتىناس ۇزىلگەن تۋىستاردىڭ ۇيلەرىن ارنايى ارالاۋ دا ايت كۇندەرى اسا ماڭىزدى»، - دەدى باس يمام.  

قالا اكىمى ەربولات دوسايەۆتىڭ ايت مەرەكەسىمەن ارنايى قۇتتىقتاۋىن قالا اكىمىنىڭ ورىنباسارى ارمان ورازباي ۇلى الماتىلىق جاماعاتقا جەتكىزدى.

«بارشاڭىزدى مۇسىلمان قاۋىمى ءۇشىن قاسيەتتى ورازا ايت مەيرامىمەن شىن جۇرەكتەن قۇتتىقتايمىن! مەملەكەت باسشىسى قاسىم-جومارت توقايەۆ ايتقانداي، «رامازان ايىنا جالعاسقان بۇل جارقىن مەرەكە قاستەرلى دىنىمىزدەگى مەيىرىم مەن شاپاعات، جاناشىرلىق پەن قامقورلىق سياقتى اسىل قۇندىلىقتاردى دارىپتەيدى» ورازا ايت مەرەكەسىندە تىلەگەن بارلىق دۇعا-تىلەكتەرىڭىز قابىل بولسىن!» دەلىنگەن قالا اكىمىنىڭ قۇتتىقتاۋ حاتىندا.

ايت نامازىنان سوڭ كاسىپكەرلەردىڭ دەمەۋشىلىگىمەن 200 بالاعا ايتتىق سىيلىقتار ۇلەستىرىلدى. ورتالىق مەشىتتىڭ الاڭىندا 500 ادامعا ايتتىق داستارحان جايىلىپ، جاماعات ىنتىماعى مەن بىرلىگى ءۇشىن ۇلتتىق ويىنداردان سايىستار وتكىزىلدى. جۇلدەلى ورىن العان قاتىسۋشىلارعا قارجىلاي جانە باعالى سىيلىقتار بەرىلدى.

وسىلايشا الماتىلىق مۇسىلمان جاماعاتى ايت مەرەكەسىن يماندىلىق ءسان-سالتاناتىنا ساي اتاپ ءوتتى.

دەرەككوز: Asan.kz