"ۋتۋلالىمعا جول جوق" قوزعالىسىنىڭ بەلسەندىسى نۋراددين سادىقوۆ ۇكىمەت ۋتيلالىم مولشەرىن 50 پايىزدان ارى تومەندەتۋگە قۇلىقتى ەمەس دەپ، قوعامدىق بەلسەندىلىگىن توقتاتاتىنىن ءمالىم ەتتى.
"مەنىڭ سۋبەكتيۆتى پىكىرلەرىم (ارينە، قاتەلەسكەن بولسام جاقسى بولار ەدى)
1. ۇكىمەت سول ۋتيلالىمعا جاساعان 50% جەڭىلدىكتەن ءارى قاراي تۇسىرۋگە پەيىلدى ەمەس. ونى سوڭعى كۇندەرى جاساپ جاتىرعان جۇرىستەرى دالەلدەپ وتىر. 50%-دىق جەڭىلدىككە قاتىستى بۇيرىق بۇگىن-ەرتەڭدەرى كۇشىنە ەنۋى كەرەك.
2. ءقازىر قىمباتتاعان كولىك – ودان ءارى قىمباتتاماسا، ارزاندامايدى. سەبەبى، بىزدە ءاۆتووندىرىس جوق، سول ءسوزدى سىلتاۋ ەتكەن الىپساتارلىق بار. ال، ول – سىرتقى ۆاليۋتاعا تاۋەلدى.
3. الەمدە كولىك دەفيسيت، قىمبات، بىزدە دە سول سەبەپ بولىپ وتىر دەگەن دالباسا پىكىر. ءيا، الەمدە پاندەميا سالدارىنان تۋىنداعان پروبلەما بولدى. ءقازىر بۇل ماسەلە شەشىلىپ، الەم كولىك دەفيسيتىنەن بىرتە-بىرتە ايىعىپ كەلەدى. قولدان قىمباتتاتىپ وتىرعان – بىزدىكىلەر.
4. ەڭ باستى سۇراققا جاۋاپ. بۇل تاقىرىپتى ءوزىم ءۇشىن ۋاقىتشا جابامىن دەپ شەشتىم. سەبەبى، اشىق ديالوگقا بارىپ، ءۋاجدى پىكىرگە قۇلاق اسۋعا قۇلىقتى بيلىكتى كورىپ وتىرعان جوقپىن. وليگوپوليا لوببيستەرى عانا بار. ال، كلاۆياتۋرا باتىرلارىنىڭ ايتاعىنا ەرىپ، جارتاسقا بارىپ، كۇندە ايعاي سالۋعا نەمەسە ايعا جەكە-دارا شابۋعا راسىن ايتقاندا، قۇلقىم جوق. بۇل مەنىڭ شەشىمىم. قۇرمەتتەيسىزدەر مە، سوگە جاماندايسىزدار ما، ءوز ەرىكتەرىڭىز. وسىمەن ءسوز ءتامام" دەپ جازدى بەلسەندى الەۋمەتتىك جەلىدەگى پاراقشاسىندا.
قاڭتار وقيعاسىنان كەيىن پرەزيدەنت ق.توقايەۆ ەل ىشىندە كوپتەن ءسوز بولىپ جۇرگەن ۋتيليزاسيالىق الىم مولشەرىن تومەندەتۋ ماسەلەسىن كوتەرىپ، ۇكىمەتكە ءتيىستى تاپسىرما جۇكتەگەن. پرەمەر-مينيسترىنىڭ ءبىرىنشى رومان سكليار ۋتيلالىم كولەمىن 50 پايىزعا دەيىن عانا تومەندەتۋ مۇمكىن ەكەنىن مالىمدەپ، ۇكىمەت شەشىمىن جاريالاعان. "ۋتيلالىمعا جول جوق" توبىنىڭ بەلسەندىلەرى ستاۆكا مولشەرى ءالى دە جوعارى ەكەنىن، ۇكىمەت جەكەلەگەن توپتىڭ مۇددەسىن قورعاۋمەن اينالىسىپ وتىرعانىن، 50 پايىزعا دەيىن تومەندەتۋ نارىقتا كولىك قۇنىنىڭ ارزانداۋىنا اسەر ەتپەيتىنىن ايتادى.
