تۇركسىب اۋدانى باقىتتى وتباسى الەۋمەتتىك ورتالىعىندا تىركەلگەن انالارىمىزدىڭ بالالارىنىڭ اراسىندا "ناۋرىز – كوكتەم مەيرامى" اتتى سۋرەت بايقاۋى ءوتتى.

ناۋرىز مەرەكەسىنىڭ اسەمدىلىگىن سۋرەتتەۋگە تىرىسقان بالالار ۇشقىر قيالدارىنىڭ تەرەندىگىن كورسەتتى. وتكىزىلگەن شارانىڭ ماقساتى – بالالاردىڭ شىعارماشىلىق قابىلەتىن شىڭداپ، ءوز بەلسەندىلىگىن كورسەتۋگە مۇمكىندىك بەرۋ، سونداي-اق دارىندى جاستاردى انىقتاۋ جانە كوپشىلىككە شىعارماشىلىق شەبەرلىگىن، قابىلەتىن كورسەتۋگە مۇمكىندىك جاساۋ بولدى.

شاراعا جالپى سانى 50 بالا قاتىستى. تورەشىلەردىڭ شەشىمىمەن ۇزدىكتەرى انىقتالىپ، ماداقتاما قاعازدارىمەن جانە ارنايى سىيلىقتارمەن ماراپاتتالدى.

وسى شارانىڭ وتكىزۋىنە سەپتىگىن تيگىزىپ، دەمەۋشى رەتىندە ات سالىسقان الماتى قالاسى ماسليحاتى، "AMANAT" پارتياسىنىڭ دەپۋتاتى، شاردينوۆ شۋحراد احمەتجانوۆيچ مىرزاعا العىسىمىزدى بىلدىرەمىز.

ەلىمىزدەگى ءار وتباسىنىڭ حال-احۋالىنا ءۇڭىلۋ، ءومىر ءسۇرۋ دەڭگەيىن زەرتتەۋ، الەۋمەتتىك جاعدايىن جاقسارتۋ – وزەكتى ماسەلەلەردىڭ ءبىرى. وسى رەتتە حالىقتىڭ الەۋمەتتىك جاعدايىن كوتەرۋ الماتى قالاسى تۇركسىب اۋدانى اكىمىدىگىنىڭ نازارىنان تىس قالعان ەمەس. مۇنداي كەزەك كۇتتىرمەيتىن ماسەلەلەردى شەشۋ ماقساتىندا 2019 جىلعى تامىز ايىندا تۇركسىب اۋدانى اكىمدىگىنىڭ قولداۋىمەن باقىتتى وتباسى الەۋمەتتىك ورتالىعى اشىلىپ، ءوز جۇمىسىن باستادى.

اتالمىش الەۋمەتتىك ورتالىق الەۋمەتتىك ءال-اۋقاتى تومەن وتباسىلارعا، كوپبالالى، جالعىزباستى، مۇگەدەك بالا اسىراپ وتىرعان وتباسىلارعا زاڭ، پسيحولوگيالىق تۇرعىدان كومەك كورسەتەدى. سونىمەن قاتار، بالالا­رىن بالاباقشا كەزەگىنە تۇرعىزۋ، تۇرعىن ءۇي كەزەگىنە تۇرعىزۋ، egov پورتالى ارقىلى انىقتامالار الۋ، اتاۋلى الەۋمەتتىك كومەككە تىركەۋ، "وتباسى بانك" قىزمەتكەرلەرىنەن باسپانا الۋ تۋرالى كەڭەس الۋ جۇزەگە اسىرىلادى.

انالاردىڭ بىلىكتىلىگىن ارتتىرۋ ماقساتىندا، جۇمىسپەن قامتۋ نەگىزىندە باقىتتى وتباسى الەۋمەتتىك ورتالىعىندا شاشتاراز، بەت ارلەۋ، كىرپىك ءوسىرۋ، تىرناق جاساۋ، كومپيۋتەرلىك بىلىكتىلىك، سمم ماركەتينگ، كيىز باسۋ، بالالارعا جانە ەرەسەكتەرگە ارنالعان ماسساج، اعىلشىن كۋرستارى تەگىن وقىتىلادى. ءوز كاسىبىن اشىپ بيزنەسكە بەت بۇرعان انالارعا بيزنەس باستاۋ بويىنشا ترەنينگ وتكىزىپ، بيزنەس يدەياسىن جۇزەگە اسىرۋعا اتسالىسىپ، كاسىبىن قالاي جۇرگىزۋ كەرەكتىگى تۋرالى ارنايى مامانداردان كەڭەس الۋلارىنا جاعداي جاسالعان.

الماتى قالاسى تۇركسىب اۋدانى باقىتتى وتباسى الەۋمەتتىك ورتالىعىنىڭ باستى ماقساتى – مۇقتاج بولعان كوپبالالى جانە از قامتىلعان وتباسىلاردىڭ ءومىر ءسۇرۋ دەڭگەيىن كوتەرۋ جانە الەۋمەتتىك جاعدايىن جاقسارتۋ.