دوستىق ءۇيىنىڭ 30 جىلدىعىن مەرەكەلەۋ اياسىندا وسكەمەن قالاسىندا VIءىى وبلىستىق ءداستۇرلى «ستۋدەنتتىك كوكتەم-2022» فەستيۆالى ءوتتى. سوڭعى ەكى جىلدا كوروناۆيرۋس ىندەتىنە بايلانىستى ونلاين فورماتقا كوشكەن ەدى. بيىل بايقاۋ جاستارعا قايتادان ايقارا ەسىك اشتى.
ءبىلىمدى دە ونەرلى ستۋدەنتتەر ۇلكەن ساحنادا جۇزبە-جۇز قاۋىشتى. شارا شىعارماشىلىق، «جاستار تاڭداۋى» جانە كاسىپتىك باعدار بەرۋ اتتى 3 باعىتتا ءوتتى. 4 ۋنيۆەرسيتەت پەن 6 كوللەدج ستۋدەنتى باس قوستى.
فەستيۆالگە قاتىسۋشىلار ەلىمىزدەگى ۇلتارالىق كەلىسىمدى ۇلىقتاپ، بەرەكە-بىرلىكتى تۋ ەتىپ كورسەتتى.
«وڭىردە جاستار ساياساتىن ناسيحاتتاۋدا «ستۋدەنتتىك كوكتەم» فەستيۆالى ەرەكشە رول اتقارادى. دوستىق ءۇيىنىڭ 30 جىلدىعىن مەرەكەلەۋ اياسىندا، شارا ۇلتارالىق بىرلىك تاقىرىبىنا ارنالعان. ەڭ باستى قازاقستاننىڭ قۇندىلىعى بۇل ارينە ءبىزدىڭ تۇراقتىلىعىمىز ارينە ءبىزدىڭ ۇلتارالىق كەلىسىمىمىز سوندىقتان وسى يدەولوگيانى ناسيحاتتاۋ ءۇشىن وسىنداي ۇلكەن فورماتتا وتكىزىپ وتىرمىز» دەدى شقو ىشكى ساياسات باسقارماسىنىڭ باسشىسى جاسۇلان سارسەبايەۆ.
«ستۋدەنتتىك كوكتەم-2022» فەستيۆالىنىڭ باستى ماقساتى ستۋدەنتتەردىڭ قوعامداعى بەلسەندىلىگىن جانە مادەني-شىعارماشىلىق الەۋەتىن ارتتىرۋ، ورىنداۋشىلىق شەبەرلىگىن شىڭداۋ، دارىندى ستۋدەنتتەردى قولداۋ، وبلىستاعى وقۋ ورىنداردىڭ كاسىبي باعدار بەرۋ بويىنشا جۇمىستارىن جانداندىرۋ.
فەستيۆال قورىتىندىسى بويىنشا بەس نوميناسيا بويىنشا جەڭىمپازدار انىقتالدى. رىمبەك بايسەيىتوۆ اتىنداعى سەمەي قارجى-ەكونوميكالىق كوللەدجى «ۇزدىك كاسىبي الاڭ» نوميناسياسى بويىنشا، جوو اراسىنداعى «ۇزدىك شىعارماشىلىق باعدارلاما» داۋلەت سەرىكبايەۆ اتىنداعى شقمتۋ جەڭىمپاز اتاندى. سەمەي قالاسىنداعى ءاليحان بوكەيحان ۋنيۆەرسيتەتى «جوعارى وقۋ ورىندارى اراسىنداعى ۇزدىك كاسىبي الاڭ» دەپ تانىلدى. «جاستار تاڭداۋى» نوميناسياسىن سارسەن امانجولوۆ اتىنداعى شىعىس قازاقستان ۋنيۆەرسيتەتى جەڭىپ الدى.
سونىمەن قاتار مۇندا بولاشاق مەكتەپ جانە كوللەدج تۇلەكتەرىنە كاسىپتىك باعدار بەرىلدى وقۋ ورىندارى ماماندىق تۇرلەرىمەن تانىستىردى. وسكەمەننىڭ مىڭنان استام جوعارى سىنىپ وقۋشىلارى قاتىستى.
«بولاشاقتا مەن جۋرناليست بولعىم كەلەدى. ءوزىم ءۇشىن جوو تاڭداپ قويدىم. ۇيىمداستىرۋشىلارعا ءاربىر وقۋ ورنىمەن تانىسۋعا مۇمكىندىك بەرگەنى ءۇشىن راحمەت» دەدى بولاشاق تالاپكەر يۋليا سولوماتينا.
بۇگىندە شقو-دا جاستاردىڭ 25 پايىزىن ستۋدەنتتەر قۇرايدى. ءوڭىردىڭ 8 جوعارى وقۋ ورنى مەن 86 كوللەدجىندە 66 548 ستۋدەنت ءبىلىم الۋدا. «بىلىكتى مامان» جوباسى بويىنشا، سوڭعى ەكى جىلدا، وڭىردە تاپشى ماماندار دايىنداۋعا وبلىس اكىمىنىڭ ارنايى گرانتتارى ءبولىنىپ كەلەدى. وسى كۇنى 646 جاس گرانت يەگەرى اتانىپ وتىر. جۇمىستىڭ وڭ ناتيجە بۇگىننىڭ وزىندە كورىنىس تابۋدا. سوڭعى ەكى جىلدا مەكتەپ تۇلەكتەرىنىڭ ءبىلىم الۋ ءۇشىن شەتەلگە كەتۋى ءۇش ەسەگە ازايدى.
