1 مامىر – 130-دان استام ۇلتتى "شاڭىراقتىڭ ءبىرىڭعاي كۇمبەزىمەن" بىرىكتىرگەن، بىرەگەي قازاقستان رەسپۋبليكاسىنىڭ اۋماعىندا ونداعان جىلدار بويى دوستىق پەن ءوزارا تۇسىنىستىكتە ءومىر ءسۇرىپ كەلە جاتقان حالىقتىڭ كەلىسىمى، تاتۋلىعى جانە توپتاسۋ كۇنى. شىعىس قازاقستاندا قازاقستان حالقىنىڭ بىرلىگى كۇنىنە ارنالعان مەرەكەلىك ءىس-شارالار وتۋدە.
پرەزيدەنت قاسىم-جومارت توقايەۆ بۇل مەرەكەنى ۇلت بىرلىگىنىڭ جارقىن سيمۆولى دەپ اتادى. مەملەكەت باسشىسى وتانداستارىنا قۇتتىقتاۋ سوزىندە حالىقتىڭ ساناسىندا تەرەڭ تامىر جايعان دوستىق پەن ءوزارا تۇسىنىستىك داستۇرلەرى ەلدەگى ۇيلەسىمدىلىكتىڭ، بەيبىتشىلىك پەن كەلىسىمنىڭ نەگىزىنە اينالعانىن اتاپ ءوتتى. پرەزيدەنتتىڭ پىكىرىنشە، بەرەكەلى قازاق جەرىندە تاريحي قالىپتاسقان مادەنيەتتەردىڭ سان الۋاندىعى – ءبىزدىڭ بىرەگەيلىگىمىزدىڭ اجىراماس بولىگى.
جاڭا قازاقستاننىڭ يدەياسى قوعامدى توپتاستىرۋدىڭ قۋاتتى فاكتورى دەپ پرەزيدەنت قاسىم-جومارت توقايەۆ ەرەكشە اتاپ ءوتتى. مەملەكەت باسشىسى قازاقستان حالقىنىڭ بىرلىگى كۇنىنە وراي قۇتتىقتاۋىندا جاسامپاز قۋاتقا سۇيەنە وتىرىپ، ءارقايسىمىز ەلىمىزدىڭ جان-جاقتى جاڭارۋىنا ءوز ۇلەسىمىزدى قوسۋىمىز كەرەكتىگىن اتاپ ءوتتى. ورتاق مۇراتتار مەن قۇندىلىقتارعا سۇيەنۋ بىزگە بارلىق قيىندىقتار مەن جاھاندىق سىن-قاتەرلەردى سەنىمدى جەڭۋگە كومەكتەسەدى، دەپ ەسەپتەيدى توقايەۆ.
ءداستۇرلى تۇردە بۇل كۇنى شىعىس قازاقستاننىڭ قالالارى مەن اۋداندارىندا ۇلتتىق سپورت تۇرلەرىنەن سايىس ءوتىپ، ءان ايتىلىپ، كونكۋرستار مەن جارىستار، قولونەرشىلەر بۇيىمدارىنىڭ كورمەلەرى، جارمەڭكەلەر جانە باسقا دا ءىس-شارالار ۇيىمداستىرىلدى.
سالتاناتتى شارا اياسىندا وبلىس ورتالىعىندا، وسكەمەننىڭ باس الاڭىندا ءوڭىردىڭ شىعارماشىلىق ۇجىمدارىنىڭ قاتىسۋىمەن كونسەرت ءوتتى. شارا اياسىندا وبلىس اكىمى دانيال احمەتوۆ جەرلەستەرىن قۇتتىقتاپ، ەلدەگى بەيبىتشىلىك پەن كەلىسىمدى نىعايتۋدىڭ ماڭىزدىلىعىن اتاپ ءوتتى.
"بۇگىندە ەلىمىز پرەزيدەنت قاسىم-جومارت توقايەۆتىڭ باسشىلىعىمەن الدىنا بيىك ماقساتتار قويىپ، جاڭا قازاقستاندى قۇرۋعا كىرىستى. مۇنىڭ ءبارى جاسامپاز ەڭبەكتىڭ جەمىسى، كوپ ۇلتتى حالقىمىزدىڭ تاتۋلىقتىڭ جەڭىسى" دەدى ءوڭىر باسشىسى.
سونىمەن قاتار شىعىسقازاقستاندىقتارعا دەنساۋلىق، تابىس پەن باق-بەرەكە تىلەدى.
شقو اقپارات ورتالىعى
