تۇركمەنستاندىق ايەلدەرگە كىرپىك جابىستىرۋعا، تاتۋاج، بوتوكس جاساتۋعا زاڭ جۇزىندە تىيىم سالىنعان بولاتىن. BBC دەرەكتەرىنە سۇيەنسەك، جابىق مەملەكەتتەگى ايەلدەرگە قاتىستى تىيىمدار كۇن ساناپ ارتىپ جاتىر. 

بۇل باستامالاردى 12 ناۋرىزدا اكەسى گۋربانگۋلى بەردىمۇحامەدوۆتىڭ ورنىنا كەلگەن 40 جاستاعى پرەزيدەنت سەردار بەردىمۇحامەدوۆ كوتەرگەن. ايەلدەرگە قاتىستى بۇيرىقتار مەن تىيىم – تۇركمەنستان بيلىگىنىڭ "اتا ءداستۇرى" دەسەك تە بولادى. سەبەبى مۇنداي جاعداي تۇركمەنستاننىڭ العاشقى پرەزيدەنتى بيلىك ەتكەن كۇننەن باستاپ جالعاسىپ كەلەدى. 

"تۇرىكمەندەر سەردار بەردىمۇحامەدوۆ اكەسىنەن گورى پروگرەسسيۆ جولدى ۇستانادى دەپ ۇمىتتەندى، ءبىراق ولار قاتتى قاتەلەستى"، دەلىنگەن حالىقارالىق جوسپارلى اتا-انا فەدەراسياسىنىڭ مالىمدەمەسىندە.

فەدەراسيا دەرەگىنشە، تۇركمەنستاندا تۇسىك جاساتۋعا دا تىيىم سالىنعان. ال جۇكتىلىكتى توقتاتۋدىڭ رۇقسات ەتىلگەن مەرزىمىن 12 اپتادان 5 اپتاعا دەيىن قىسقارتقان. ءبىراق مۇنداي ەرتە مەرزىمدە كوبىنە ايەلدەر ءوزىنىڭ جۇكتى ەكەنىن بىلمەي جاتادى. 

"ۇلتتىق داستۇرگە قايشى كەلەدى"

تۇركمەنستانداعى ايەلدەر مامىر ايىنان باستاپ تاكسيدىڭ ارتقى ورىندىعىنا وتىرۋعا ءماجبۇر. ايەلدەردىڭ ايتۋىنشا، تاكسي جۇرگىزۋشىلەرىنە تاكسيپارك باسشىلارىنان وسىنداي بۇيرىق كەلىپ تۇسكەن. الايدا مەملەكەتتىك قۇجاتتاردا مۇنداي بۇيرىق تۋرالى اقپارات كورسەتىلمەگەن. 

"2017 جىلدان بەرى تۇركمەنستانداعى ايەلدەرگە جۇرگىزۋشى كۋالىگى بەرىلمەي كەلەدى. ءتىپتى، جۇرگىزۋشى كۋالىگىنىڭ بەرىلمەۋ سەبەبىن دە تۇسىندىرمەيدى. سول سەبەپتى ءقازىر سالىنىپ جاتقان تىيىمدار مەن بۇيرىقتار كوپشىلىكتى تاڭعالدىرمايدى" دەيدى Turkmen.news سايتىنىڭ رەداكتورى رۋسلان مياتييەۆ. 

ونىڭ ايتۋىنشا، كولىكتىڭ الدىنعى ورىندىعىنا وتىرعان ايەلدەردى پوليسەي توقتاتىپ، ەسكەرتۋ جاساعان. 

ايىپپۇلدار مەن جۇمىستان قۋۋ

مەملەكەتتىك قىزمەتتەگى ايەلدەردىڭ تىرناق بوياپ، تاتۋاج جاساۋىنا تىيىم سالىنعان.  "راديو ازاتلىك" سايتىنىڭ مالىمەتىنشە، بوتوكس پەن تاتۋاج جاساعان 20 بورتسەرىك ايەلدى جۇمىستان شىعارىپ جىبەرگەن. ال سۇلۋلىق سالونىنىڭ باسشىلارىنا ەسكەرتۋ جاسالعان. ەگەر زاڭعا باعىنبايتىن بولسا، ايىپپۇل سالىنادى نەمەسە 15 كۇنگە قامالادى. 

كۋاگەرلەر قوعامدىق ورىنداردا پوليسيا قىزمەتكەرلەرى تەكسەرىس جۇرگىزىپ، بۇيرىققا باعىنباعان ايەلدەرگە ەسكەرتۋ جاساپ جۇرگەنىن دە ايتىپ جاتىر. 

تۇركمەنستانداعى حالىقارالىق كومپانيادا جۇمىس ىستەيتىن ۋميدا (ەسىمى وزگەرتىلگەن) ەسىمدى تۇرعىن ءقازىر تەكسەرىس تەك مەملەكەتتىك قىزمەتتەگى ايەلدەر اراسىندا قاتاڭ ءجۇرىپ جاتقانىن ايتادى. ازىرگە ۋميدا جۇمىس ىستەيتىن كومپانيادا تىرناق بوياپ، كىرپىك جابىستىرۋعا تىيىم سالىنباعان كورىنەدى. 

تۇركمەنستان بيلىگى ايەلدەردىڭ بويانۋىنان بولەك قوعامدىق ورىندا سەزىمىن ءبىلدىرۋى دە ۇلتتىق قۇندىلىققا قارسى كەلەدى دەپ ەسەپتەيدى. شەتەلدىك باق-تىڭ دەرەگىنشە، كوشەدە قول ۇستاسىپ جۇرگەن جاستار قاماۋعا الىنعان. قاماۋعا الىنعان جاستاردى "الداعى ۋاقىتتا كوشەدە قول ۇستاسىپ، سەزىمىن اشىق بىلدىرمەيمىز" دەگەن ماتىندە قولحات جازدىرىپ العاننان كەيىن بوساتقان.