مەكسيكالىق بوكسشى ساۋل الۆارەس رەسەيلىك دميتريي بيۆولمەن جاقىن ارادا ريەۆانش وتكىزۋگە دايىن. بۇل تۋرالى گەنناديي گولوۆكيننىڭ پروموۋتەرى ەددي حيرن ايتتى دەپ جازادى Sports.kz.
"كانەلونىڭ" بيۆولدان جەڭىلۋى گولوۆكينمەن جەكپە-جەكتىڭ وتپەۋىنە سەبەپ بولۋى مۇمكىن. مەكسيكالىق بوكسشى مەن گولوۆكيننىڭ ءۇشىنشى جەكپە-جەگى بيىل قىركۇيەك ايىنا جوسپارلانعان بولاتىن. ءبىراق "كانەلو" مامىر ايىندا دميتريي بيۆولمەن كەزدەسىپ، جەڭىلىسكە ۇشىراعان. بۇل جاعداي "كانەلونىڭ" جوسپارلارىن وزگەرتىپ وتىر.
– مەن كەشە "كانەلومەن" سويلەستىم. دۇيسەنبىدە ءبىز الداعى جوسپارلار تۋرالى اقىلداساتىن بولامىز. ءبىز ونىڭ قىركۇيەكتە ورتا سالماقتا "ءابسوليۋتتى چەمپيون" اتاعى ءۇشىن GGG-مەن جۇدىرىقتاسۋ جوسپارى بارىن بىلەمىز. بۇل جەكپە-جەكتى مىندەتتى تۇردە وتكىزۋىمىز كەرەك. الايدا ءقازىر كانەلو بيۆولمەن ريەۆانش جاساۋعا اسىق. ول بيۆولمەن جۇدىرىقتاسقاننان كەيىن عانا GGG-مەن كەزدەسەدى دەپ ويلايمىن. ونى ۇيىمداستىرۋدىڭ جالعىز مۇمكىندىگى وسى عانا بولۋ كەرەك. شەشىمدى ءبىر اپتادان كەيىن ناقتىلايمىز، – دەدى ەددي حيرن.
پىكىر قالدىرۋ