جۋرناليست، جازۋشى داۋرەن وماروۆ "قازمۇنايگاز" ۇلتتىق كومپانياسى باسپا ءسوز قىزمەتىنىڭ جەتەكشىسى بولىپ تاعايىندالدى. بۇل تۋرالى جۋرناليست ءوزىنىڭ Facebook پاراقشاسىندا ءمالىم ەتتى.

داۋرەن باۋىرجان ۇلى وماروۆ الماتى قالاسىندا دۇنيەگە كەلگەن

قازۇۋ شىعىستانۋ فاكۋلتەتىنە وقۋعا ءتۇسىپ، ۇزاماي ىرىكتەۋ سىندارىنان ءوتىپ، قىتايعا وقۋعا جولداما الادى.

2005-2006 جىلدارى شىعىس-قىتاي پەداگوگيكالىق ۋنيۆەرسيتەتىندە جۇڭگو ءتىلى كۋرسىنان وتكەن.

2006-2010 ارالىعىندا شىعىس-قىتاي عىلىم جانە تەxنولوگيالار ۋنيۆەرسيتەتىنە ينجەنەرلىك مەنەدجمەنت ماماندىعى بويىنشا باكالاۆر دارەجەسىن العان.

2010-2012 جىلدار اراسىندا اتاۋلى ءبىلىم ورداسىندا ماگيستراتۋرادا وقىپ، ەكونوميكالىق قۇقىق ماگيسترى دارەجەسىن العان.

ءبىلىم الۋمەن قاتار رەسپۋبليكالىق "ايقىن"، استانالىق "استانا اقشامى" گازەتتەرىنىڭ قىتايداعى ءتىلشىسى قىزمەتتەرىن قوسا اتقارعان. اتاۋلى باسىلىمدارعا 100-دەن استام تانىمدىق ماقالالارى شىققان.

2012 جىلدان باستاپ "قازاقستان" ۇلتتىق ارناسىنىڭ جۇڭگو حالىق رەسپۋبليكاسىنداعى مەنشىكتى ءتىلشىسى قىزمەتىن اتقارعان. جۇمىس بابىمەن قىتايداعى قانداستارىمىز تۇراتىن بۇكىل مەكەندى ارالاپ، ولاردىڭ تۇرمىس-تىرشىلىگىمەن جەتە تانىسادى. اتالعان قىزمەتتى 2015 جىلدىڭ جەلتوقسانىنا دەيىن ءجۇرىپ، 600-دەن استام بەينەماتەريالىن جاريالاعان.

2015-2016 جىلدار ارالىعىندا ق ر شانxاي (قحر) قالاسىنداعى باس كونسۋلدىعىندا قىزمەت ىستەگەن.

ارتىنشا شىعىس-قىتاي عىلىم جانە تەxنولوگيالار ۋنيۆەرسيتەتىن قوعامدىق مەنەدجمەنت جانە الەۋمەتتىك  ساياسات فاكۋلتەتى دوكتورانتۋراسىن ءتامامداعان.

وسى ۋاقىتقا دەيىن قىتايتانۋ تاقىرىبىندا "ەرتە تۇراتىن ەل"، "مەرەكەسى مول مەملەكەت"،  "جاھانعا جايىلعان جۇرت" اتتى كىتاپتارى جارىق كورگەن.

داۋرەن باۋىرجان ۇلىنىڭ ىزدەنىمپازدىلىعى جوعارى باعالانىپ، مەملەكەتتىك باسىلىمداردا جاريالانعان  ەڭبەگى ءۇشىن  "جاستار – 2011" رەسپۋبليكالىق جاستار پرەمياسىنىڭ "جىلدىڭ جاس ءجۋرناليستى" نوميناسياسىنىڭ، 2012 جىلى "شابىت" حالىقارالىق فەستيۆالىنىڭ پروزا جانرى بويىنشا گران-پريىنىڭ، 2017 جىلى "جۋرناليستيكا نوميناسياسى بويىنشا "دارىن" مەملەكەتتىك جاستار پرەمياسىنىڭ يەگەرى اتاندى.  

ءبىلىم-عىلىم جولىندا جەتىستىككە جەتىپ قانا قويماي، 2016 جىلدان بەرى كاسىپكەرلىكپەن اينالىسقان. جۇڭگو مەن قازاقستان كاسىپكەرلەرىنە حالىقارالىق بيزنەس جانە ينۆەستيسيالار  بويىنشا كونسالتينگ، كەدەندىك راسىمدەۋ، جۇك تاسىمالى قىزمەتتەرىمەن اينالىساتىن جەكە كومپانيا جۇمىسىن جۇرگىزگەن.

قامشى پورتالى داۋرەن وماروۆتى جاڭا قىزمەتىمەن قۇتتىقتاي وتىرىپ، جاۋاپتى جۇمىسىندا جەمىستى ەڭبەك ەتۋىن، ابىروي بيىگىنەن كورىنۋىن تىلەيدى.