قازاقستاندىق ساياساتكەر، اتىراۋ وبلىسىنىڭ بۇرىنعى اكىمى بەرگەي رىسقالييەۆ باس پروكۋرور بەرىك اسىلوۆقا ارىز جازىپ، ءماجىلىس دەپۋتاتى ءسالىمجان ناقپايەۆتى "جالعان مالىمدەمە جاسادى" دەپ ايىپتاپ، ونى جاۋاپقا تارتۋدى سۇرادى. بۇل تۋرالى رىسقالييەۆ ءوزىنىڭ facebook پاراقشاسىندا جاريالاعان.
"ماعان قاتىستى ءىس تۇگەلدەي ساياسيلاندىرىلعان. كەزىندە قازىرگى پارلامەنت دەپۋتاتى ءسالىمجان ناقپايەۆ باۋىرجان بايبەكتىڭ قولداۋىمەن ماعان جانە باسقا دا اكىمدىك قىزمەتكەرلەرىنە قارسى ارىز جازعان بولاتىن. سوتتىڭ بارلىق شەشىمدەرىنەن كەيىن مەنىڭ ادۆوكاتتارىم پارلامەنت دەپۋتاتى ناقپايەۆتىڭ جالعان دەنونساسيا جازعانىن تولىق دالەلدەگەن ەدى. ماعان قارسى قولدانىلعان بارلىق فاكتىلەر شىندىققا جاناسپايدى. 2022 جىلدىڭ 20 مامىرىندا باس پروكۋراتۋرا ناقپايەۆ جالعان كۋالىك بەرگەنى تۋرالى جازعان ارىزىمدى قابىلدادى. باس پروكۋراتۋرادان جاۋاپ كۇتەمىز"، دەلىنگەن ەكس-اكىم جازباسىندا.
رىسقالييەۆ ءوز ارىزىندا تەك ءسالىمجان ناقپايەۆتى ايىپتاپ قانا قويماي، بۇگىنگە دەيىنگى سوت ۇكىمدەرىن قايتا قاراپ، باس پروكۋروردان ادىلەتتى تەرگەۋدى سۇراعان. سونداي-اق سوت وتىرىسىنا ۆيدەو ارقىلى ونلاين تۇردە قاتىسۋعا دايىن ەكەنىن جەتكىزگەن.
پىكىر قالدىرۋ