پرەزيدەنت قاسىم-جومارت توقايەۆ 16 ناۋرىز كۇنى حالىققا جاساعان ءداستۇرلى جولداۋىندا ەلدە ءۇش جاڭا وبلىس قۇرۋدى ۇسىندى. اتاپ ايتۇقاندا سەمەي ايماعىندا اباي وبلىسىن، جەزقازعان اۋماعىندا ۇلىتاۋ وبلىسىن، تالدىقورعاۋ اۋماعىندا جەتىسۋ وبلىستارى قۇرىلماق. وسىلايشا، شىعىس قازاقستان وبلىسىنىڭ اكىمشىلىك-اۋماقتىق قۇرىلىمىنا وزگەرىس ەنبەك.

– حالىقتىڭ قالاۋىن ەسكەرىپ، بۇگىن ءبىرقاتار باستاما كوتەرمەكپىن. ەڭ الدىمەن، سەمەي ايماعىندا اباي وبلىسىن قۇرۋدى ۇسىنامىن. سەمەي قالاسى جاڭا وبلىستىڭ ورتالىعى بولادى. وسى ماسەلەنى ايماق قۇرىلىمدارى كوپتەن بەرى ايتىپ جۇرگەنى بەلگىلى. ءقازىر ول جاقتا شەشىمىن تاپپاعان تۇيتكىلدەر از ەمەس. مىسالى، ايماقتىڭ ىشكى-ينفراقۇرىلىمى ابدەن توزعان. كەزىندە الاش ارىستارىنىڭ باسىن قوسقان سەمەي قالاسىنىڭ جاعدايى ءماز ەمەس. ءبىز تاريحي ادىلدىكتى ورناتىپ، ۇلىلارىمىز دۇنيەگە كەلگەن كيەلى ولكەنى قايتا جاڭعىرتۋعا ءتيىسپىز، – دەدى مەملەكەت باسشىسى.

سونىمەن، الاشتىڭ رۋحاني ورداسى 25 جىلدان كەيىن وبلىس مارتەبەسىنە قايتادان يە بولماق. بۇل شەشىمدى سەمەيلىكتەر كوپ كۇتتى. بۇگىندە سەمەيدە 350 مىڭ ادام تۇرادى. جاڭالىق شىققالى جۇرشىلىق قۋانىشىندا شەك جوق.

«پرەزيدەنت حالىق ۇنىنە قۇلاق اسىپ، ەل قالاۋىن ورىندادى»، – دەيدى ولار.

قوعامدىق كولىكتەردىڭ دۇرىس قاتىناماۋى، قوقىسقا تولعان جاشىكتەر، جىلدار بويى جوندەلمەگەن كوپىرلەر، شۇرىق تەسىك جولدار حالىقتى ابدەن شارشاتقان. ەندى ولار كوپ كۇتتىرمەي شەشىمىن تاپپاق. ەندى ءوز الدىنا اباي وبلىسى قۇرىلىپ، جەكە بيۋدجەت بەكىتىلەدى. جەرگىلىكتى باسقارۋ ورگاندارى قايتا قۇرىلادى. ءوڭىر ەكونوميكاسى وركەندەپ، حالىقتىڭ الەۋمەتتىك جاعدايى جاقسارماق.

بۇدان بولەك شىعىس قازاقستان وبلىسىنىڭ اكىمشىلىك-اۋماقتىق قۇرىلىمىن وزگەرتۋ بارىسىندا تارباعاتاي اۋدانىنىڭ قۇرامىنان اقسۋات جانە تارباعاتاي اۋداندارىن، ال كوكپەكتى اۋدانىنىڭ قۇرامىنان سامار جانە كوكپەكتى اۋداندارىن ءبولۋ جولىمەن جاڭا اۋداندار قۇرۋ تۋرالى شەشىم قابىلدانىپ وتىر. الداعى ۋاقىتتا تارباعاتاي اۋدانىنىڭ اكىمشىلىك ورتالىعى – اقجار اۋىلى، اقسۋات اۋدانىنىڭ اكىمشىلىك ورتالىعى – اقسۋات اۋىلى، سامار اۋدانىنىڭ اكىمشىلىك ورتالىعى – سامار اۋىلى، كوكپەكتى اۋدانىنىڭ اكىمشىلىك ورتالىعى – كوكپەكتى اۋىلى بولىپ وزگەرمەك.

تەرريتوريالىق بولىنىستەرگە سايكەس، شىعىس قازاقستان وبلىسىنىڭ اۋماعى 97،8 مىڭ شارشى مەتر بولادى. قۇرامىنا 9 اۋدان جانە 2 قالا كىرەدى. اباي وبلىسىنىڭ اۋماعى 185،5 مىڭ شارشى مەتردى قۇرايدى،  قۇرامىنا 8 اۋدان جانە 2 قالا كىرەدى. اتاپ ايتقاندا، شقو اۋماعىندا – وسكەمەن، ريددەر قالالارى، گلۋبوكوە، زايسان، كاتونقاراعاي، كۇرشىم، سامار، تارباعاتاي، ۇلان، شەمونايحا، التاي اۋداندارى قالادى. اباي وبلىسىنا – سەمەي، كۋرچاتوۆ قالالارى، اباي، اياگوز، اقسۋات، بەسقاراعاي، بورودۋليحا، جارما، كوكپەكتى، ءۇرجار اۋداندارى قارايدى.

جاڭادان قۇرىلاتىن وبلىس حالقىنىڭ سانى – 638،3 مىڭ ادامدى قۇراسا، شىعىس قازاقستان وبلىسىنىڭ حالقى – 717،6 مىڭ بولماق، بۇل – وبلىس حالقىنىڭ 53 پايىزى. اباي وبلىسىندا سايكەسىنشە، 47 پايىز. ونەركاسىپتەردىڭ 68 پايىزى – شقو-دا، 32 پايىزى – اباي وبلىسىندا قالماق. ەكى وبلىستىڭ قالا-اۋداندارى 1997 جىلى سەمەي وبلىسى قوسىلعانعا دەيىنگى تەرريتوريالار بويىنشا بولىنگەن.