قاڭتار وقيعالارى ماڭدايىنان وق ءتيىپ قازا تاپقان 4 جاسار ايكوركەم مەلدەحاننىڭ جانۇياسى ۇقك قىزمەتكەرلەرىنىڭ قوقان-لوقىسىنان كەيىن شەتەلگە كەتىپ قالعان. بۇل تۋرالى Orda.kz اقپارات پورتالى حابارلادى.
باسىلىم ايكوركەمنىڭ اكەسى ايدوس مەلدەحان ۇقك قىزمەتكەرلەرى بىرنەشە مارتە كەلىپ، قوقان-لوقى كورسەتكەنىن ايتقانىن، ولارعا ازالى وتباسىنىڭ بەلسەندىلىگى، تەرگەۋدى تالاپ ەتىپ، جۋرناليستەرگە سۇحبات بەرگەنى ۇناماي قالعانىن جازادى. سوندىقتان وتباسىمەن شەتەلگە كەتۋگە ءماجبۇر بولعانىن، قاۋىپسىزدىكتەرى ءۇشىن قايدا كەتكەنىن ايتا المايتىنىن جەتكىزگەن.
بۇگىندە قاندى وقيعا كەزىندە جارالانعان وزگە بالالاردىڭ جاعدايى دا ءماز ەمەس. ايدوس مەلدەحاننىڭ 15 جاستاعى قىزىنىڭ دەنەسىندە ءالى دە 8 جاراقات جارىقشاعى بار. ونى شىعارۋ مۇمكىن بولماي تۇر. جارالى قىز ۇيىنەن شىقپايدى، قوزعالۋى قيىن. مەكتەپتى ونلاين بىتىرگەن. ۇيدەگى كەنشە ۇلمەن پسيحولوگ جۇمىس ىستەپ جاتىر. الىگە دەيىن قورقادى. پوستتراۆماتيكالىق شوك العان.
4 جاستاعى ايكوركەم مەلدەحان 7 قاڭتار كۇنى قازا تاپقان. مەلدەحان اۋلەتى كەشكى ۋاقىتتا ازىق-تۇلىك ىزدەپ كولىكپەن ساتپايەۆ كوشەسىنىڭ بويىمەن كەتىپ بارا جاتقان. الماتى اكىمدىگىنىڭ ماڭىنا تاياعاندا الدەكىمدەر كولىكتى اتقىلاي باستايدى. كولىكتە ايدوس مەلدەحاننىڭ ايكوركەمنەن وزگە ءبىر ۇلى مەن قىزى بولعان. ەكەۋى دە جارالانعان. ال ايكوركەمدى امان الىپ قالۋ مۇمكىن بولمادى. وق ونىڭ ماڭدايىنا تيگەن. ايدوس مەلدەحان كولىك شاناعىنان 20 وق ءىزىن تاپقانىن ايتادى. سوزىنشە، بالليستيكا ساراپتاماسى وق اسكەريلەر قولداناتىن قارۋعا تيەسىلى ەكەنىن انىقتاعان.
ازالى وتباسىعا الماتى اكىمدىگى ءۇش بولمەلى پاتەر بەرىپ، مەلدەحان اۋلەتى پاتەرگە كۇنى كەشە عانا تىركەۋگە تۇرعان. سونداي-اق بىرەر كۇن بۇرىن عانا "قازاقستان حالقىنا" قورى تاراپىنان تاعايىندالعان اقشالاي وتەماقىنى الۋ بويىنشا قۇجاتتار تىزبەسى جازىلعان حابارلاما العان.
3 ماۋسىمدا جاروكوۆ-مىڭبايەۆ كوشەلەرىنىڭ قيىلىسىندا ايكوركەمنىڭ بەينەسىمەن جانە "قاي اعا مەنى اتقان" دەگەن جازۋمەن گراففيتي پايدا بولعان. الايدا ونى بىردەن ءوشىرىپ تاستادى.
پىكىر قالدىرۋ