الماتى وبلىسى ۇلتتىق قاۋىپسىزدىك كوميتەتى دەپارتامەنتىنىڭ ەكى قىزمەتكەرى قاڭتار وقيعالارىنان كەيىن ادام ولىمىنە سوقتىرعان ازاپتاۋ دەرەگى بويىنشا ايىپتالىپ وتىر.
– الماتى وبلىسى ۇقك دەپارتامەنتىنىڭ ەكى قىزمەتكەرىنە قاتىستى تەرگەۋ امالدارى اياقتالدى. ولار ۇستالعان ازاماتتىڭ قازاسىنا سەبەپ بولعان دەنە جاراقاتىن سالدى دەگەن كۇدىككە ىلىنگەن، – دەدى باس پروكۋراتۋرانىڭ قىلمىستىق قۋدالاۋ قىزمەتىنىڭ باستىعى سەرىك شالابايەۆ ورتالىق كوممۋنيكاسيالار قىزمەتىندەگى بريفينگتە.
سونداي-اق ول قاڭتار وقيعالارى بويىنشا ارنايى پروكۋرورلار رەزونونس تۋدىرعان 8 ءىستى تەرگەپ جاتقانىن، ول بويىنشا 15 ادام كۇدىككە ءىلىنىپ، 9-ى قاماۋعا الىنعانىن جەتكىزدى.
سەرىك شالابايەۆ سونىمەن قاتار ۇتىكپەن ازاپتاۋ ءىسى بويىنشا 25 جابىرلەنۋشى انىقتالعانىن، جابىرلەنۋشىنىڭ ءبارى ۇقساس تاسىلمەن ازاپتالعانىن ايتقانىن اتاپ ءوتتى. وسى دەرەككە قاتىستى 5 پوليسيا قىزمەتكەرىنىڭ قاتىسى بارى انىقتالىپ، ولاردىڭ 3-ەۋى كىناسىن مويىنداعان.
ول ازاپتاۋ فاكتىلەرى بويىنشا تەرگەۋ بارىسىندا ءبىرقاتار قيىندىق تۋىپ جاتقانىن، ازاپتاۋشىلار ماسكامەن نەمەسە ارنايى قىزمەتتىك كيىمسىز بولعاندىقتان جابىرلەنۋشىلەر وزدەرىن ازاپتاعانداردى تاني الماي جاتقانىن ايتتى. سوزىنشە، پوليسيا عيماراتتارىنا شابۋىل جاسالعاندا قۇرال-جابدىقتار بۇلىنگەندىكتەن، ءىس بويىنشا ۆيدەوجازبالار جوق.
پىكىر قالدىرۋ