ۇقك ءتوراعاسىنىڭ بۇرىنعى ورىنباسارى سامات ءابىش قىلمىستىق تەرگەۋ نىساناسىندا. بۇل تۋرالى كوميتەت ءتوراعاسىنىڭ ورىنباسارى اسقار امەرحانوۆ ءماجىلىس كۋلۋارىندا ءمالىم ەتتى.
– قازىرگى تاڭدا سامات ءابىش تەرگەۋ وربيتاسىندا. ودان جاۋاپ الىنىپ جاتىر. ستاتۋسىن ءدال بىلمەيمىن. ول قازاقستاندا. ءوزىن كورمەدىم. ءبىراق ول ەلدە دەپ ويلايمىن. ويتكەنى تەرگەۋ ءجۇرىپ جاتىر، – دەدى ول.
سامات ءابىش قىزمەتىنەن كەتكەنى تۋرالى بەيرەسمي اقپارات العاش 5 قاڭتاردا شىققان. سونىمەن قاتار سامات ءابىش قاماۋعا الىنعانى تۋرالى اڭگىمەلەر تارادى. الايدا ۇقك اقپاراتتى تەرىستەپ، 14 قاڭتاردا سامات ءابىش قىزمەتىندە ەكەنىن، جىلسايىنعى دەمالىسىندا جۇرگەنىن ءمالىم ەتكەن. ءبىراق ول جەردە ونىڭ دەمالىسقا قاشان شىققانى جازىلماعان.
كوميتەت اقپاراتىنان كەيىن الەۋمەتتىك جەلىدە سامات ابىشتەي ۇلتتىق قاۋىپسىزدىككە جاۋاپتى ورگان باسشىسىنىڭ ءبىرىنشى ورىنباسارى ەلدە دۇربەلەڭ بولىپ جاتقاندا قالاي عانا دەمالىستا جۇرەدى دەپ جازۋشىلار بولعان.
ارتىنشا، ۇلتتىق قاۋىپسىزدىك كوميتەتى سامات ءابىشتىڭ دەمالىستا ەكەنى تۋرالى اقپاراتتى تولىقتىرىپ، ونىڭ دەمالىسى 13 قاڭتاردان باستالعانىن جازدى.
ال 17 قاڭتاردا ونىڭ ۇقك-دەن كەتكەنى رەسمي حابارلاندى.
سامات ءابىش قازاقستاننىڭ بۇرىنعى پرەزيدەنتى نۇرسۇلتان نازاربايەۆتىڭ تۋعان ءىنىسى ساتىبالدى نازاربايەۆتىڭ بالاسى. ونىڭ ۇقك-دە ىستەگەن اعاسى قايرات ساتىبالدى ءقازىر قاماۋدا وتىر.
پىكىر قالدىرۋ