پرەمەر-مينيستر ءاليحان سمايلوۆ سەنات دەپۋتاتتارىنىڭ ايەلدەردىڭ زەينەت جاسىن تومەندەتۋ ماسەلە كوتەرگەن دەپۋتاتتىق ساۋالىنا جاۋاپ بەردى.
ۇكىمەت باسشىسىنىڭ جاۋابىندا ۇسىنىس قاراستىرىلاتىنى تۋرالى ناقتى جاۋاپ جوق. تەك زەينەت جاسىن كوتەرۋگە نەگىز بولعان سەبەپتەر تۇسىندىرىلگەن. ونىڭ سوزىنشە، ايەلدەردىڭ زەينەت جاسىن ەرلەردىكىمەن تەڭەستىرۋ ساياساتى بيۋدجەت قاراجاتىن ۇنەمدەۋ ءۇشىن ەمەس، جوعارى زەينەتاقى مولشەرىن قامتاماسىز ەتۋ ءۇشىن ەنگىزىلگەن.
"قازاقستاندىقتار بيۋدجەتتەن بازالىق جانە ىنتىماقتى زەينەتاقى الادى. ىنتىماقتى زەينەتاقى ازاماتتاردىڭ 1998 جىلعا دەيىنگى 2 ەڭبەك ءوتىلى مەن سوڭعى 3 جىلدىق تابىسى نەگىزىندە ەسەپتەلىنەدى. ناتيجەسىندە جىل سايىن بۇل تولەمنىڭ ءتۇرى كەمىپ، جيناقتاۋشى زەينەتاقى ۇلەسى وسەتىن بولادى. سوندىقتان زەينەت جاسىن تومەندەتۋ زەينەتاقى سالىمدارىنىڭ كولەمىنىڭ كەمۋىنە جانە وسى جۇيەدەن بەرىلەتىن تولەمدەردىڭ دە كۇرت قىسقارۋىنا الىپ كەلەدى. بۇل الەمدىك پراكتيكا، ياعني ءومىر ءسۇرۋ ۇزاقتىعىنىڭ وسۋىنە بايلانىستى زەينەت جاسىن كوتەرۋ ءۇردىسى دامىعان مەملەكەتتەردە دە، كورشىلەس ازەربايدجان، ارمەنيا، رەسەي، بەلورۋس ەلدەرىندە دە قولعا الىنۋدا" دەيدى پرەمەر-مينيستر.
قازاقستاندا 2018 جىلدان باستاپ ايەلدەردىڭ زەينەت جاسى جىل سايىن 6 ايعا جوعارىلاپ كەلەدى. 2028 جىلى ايەلدەردىڭ زەينەت جاسى ەرلەردىكىمەن تەڭەسىپ، ايەلدەر زەينەتكە 63 جاستا شىعاتىن بولادى. قازىرگى ۋاقىتتا ايەلدەر ءۇشىن زەينەت جاسى 60-61 جاس ارالىعىندا.
بۇعان دەيىن ۇكىمەت ازاماتتاردىڭ كەي كاتەگوريالارىنىڭ زەينەت جاسىن تومەندەتۋدى قاراستىراتىنى، ماسەلە جىل سوڭىنا دەيىن بەلگىلى بولاتىنى حابارلانعان.
قازاقستاندا ايەلدەر ءۇشىن زەينەت جاسىن ءتۇسىرۋ نەمەسە بۇرىنعىداي 58 جاسقا قايتا اكەلۋ ءجيى كوتەرىلەدى. ەلدە پرەزيدەنتتەن ايەلدەردىڭ زەينەت جاسىن 58-گە دەيىن، قاراۋىندا ەرەكشە بالالارى بار انالاردىڭ زەينەت جاسىن 55-كە دەيىن تومەندەتۋدى سۇراعان ونلاين پەتيسيا ءجۇرىپ جاتىر. وعان قازىرگى ۋاقىتتا 800 مىڭنان استام قول جينالعان.
پىكىر قالدىرۋ