قاڭتار وقيعاسىنان كەيىن قازاقستاندا ۇستالىپ، ازاپتاۋعا ۇشىراعان قىرعىز مۋزىكانتى ۆيكرام رۋزاحۋنوۆ وزىنە قاتىستى تەرگەۋ جۇمىستارىنىڭ اياقتالعانىن حابارلادى. بۇل تۋرالى مۋزىكانت ءوزىنىڭ facebook پاراقشاسىندا جازدى.

ونىڭ ايتۋىنشا،  بىشكەك قۇقىق قورعاۋ ورگاندارى تەرگەۋ ناتيجەلەرىن قازاقستانعا جىبەرەدى.

"ساراپشىلار دەنساۋلىعىما اۋىر زيان كەلگەنىن انىقتادى. جينالعان ماتەريالدار قىرعىزستاننىڭ باس پروكۋراتۋراسى ارقىلى كىنالى تۇلعالاردى انىقتاۋ جانە قىلمىستىق جاۋاپكەرشىلىككە تارتۋ ءۇشىن قازاقستاننىڭ قۇزىرلى ورگاندارىنا جىبەرىلەتىن بولادى"، دەدى ۆيكرام رۋزاحۋنوۆ.

9 قاڭتاردا "قازاقستان" جانە "حابار 24" ارنالارى "قازاقستانداعى ميتينگكە قاتىسقانى ءۇشىن قىرعىزستان ازاماتى اقشا العان" دەگەن سيۋجەت كورسەتكەن. ۆيدەودا بەتى-اۋزى كوگەرگەن ازامات 1 قاڭتاردا بەيتانىس ادامدار تەلەفون ارقىلى حابارلاسىپ، ميتينگىگە قاتىسۋ ءۇشىن 90 مىڭ تەڭگە ۇسىنعانىن، بيلەت اپەرگەنىن، قازاقستاندا پاتەرگە ورنالاستىرعانىن ايتادى. 

كوپ ۇزاماي قىرعىزستاندىق باسىلىمدار ۆيدەوداعى ادام قىرعىزستاندا بەلگىلى دجاز مۋزىكانتى ۆيكرام رۋزاحۋنوۆ ەكەنىن، قازاقستانعا كونسەرتكە كەلگەنىن جارىسا جازدى. 

ۇزاماي رۋزاحۋنوۆ بوساتىلىپ، 10 اقپان كۇنى الەۋمەتتىك جەلىدەگى پاراقشاسىندا قازاقستاننىڭ تەرگەۋ يزولياتورىندا ازاپتالعانىن مويىنداپ، مالىمدەمە جاسادى.

اقپان ايىندا قىرعىزستاندا ۆيكرام رۋزاحۋنوۆتىڭ ازاپتالۋىنا بايلانىستى قىلمىستىق ءىس قوزعالعان.