تارازداعى "قازفوسفات" زاۋىتىن اۋاعا زياندى زاتتار تاراپ كەتۋىنە بايلانىستى ۋاقىتشا جابۋ كوزدەلىپ وتىر، دەپ حابارلادى استانا تەلەارناسى.
تارازداعى الىپ ءوندىرىس "قازفوسفات" زاۋىتىندا تەحنيكالىق اپات بولىپ، ودان شىققان قويۋ ءتۇتىن قالا كوشەلەرىنە جايىلعان. وبلىستىق ەكولوگيا دەپارتامەنتىنىڭ ماماندارى كاسىپورىن جۇمىسىن ۋاقىتشا توقتاتپاق. سەبەبى، اۋاعا زياندى كۇكىرت سۋتەگىنىڭ مولشەرى شامادان تىس تاراپ كەتكەن. بۇل جاعداي تاۋلىگىنە ەكى رەت قايتالانعان.
"سانيتارلىق قوعاۋ اۋماعىنان سىناما الىنىپ، ول جەردە كۇكىرت سۋتەك زياندى زاتتار انىقتالىپ، نورمادان تىس اسقانى انىقتالدى. قازىرگى تاڭدا جوسپاردان تىس تەكسەرىس دايىندالىپ، زەردەلەۋ جۇمىستارى جۇرگىزىلىپ جاتىر. جوندەگەنگە دەيىن زاۋىت جۇمىسىن ۋاقىتشا توقتاتاتىن شىعارمىز" دەدى جامبىل وبلىسى ەكولوگيا دەپارتامەنتىنىڭ ءبولىم باسشىسى سەرىك نۇربايەۆ.
تاراز تۇرعىندارى دۇيسەنبى كەشكە الەۋمەتتىك جەلىلەردە تۇمان باسقان قالانىڭ ۆيدەولارىن جاپپاي بولىسكەن ولار جاعىمسىز ءيىس سالدارىنان تىنىس الۋ قيىنداعانىن ايتقان. قالانى ءتۇتىن باسۋىنا "قازفوسفات" زاۋىتىنداعى جاعداي سەبەپ بولعان. ساعات كەشكى 20:00-دە مونوگيدراتتى ابسوربەر سورعىسى ىستەن شىعىپ، اۋاعا گاز (كۇكىرت تريوكسيدى) تاراعان. وسىعان بايلانىستى سەح جۇمىسى شۇعىل توقتاتىلدى.
پىكىر قالدىرۋ