بيىل باكالاۆرياتقا ءتۇسۋ ءۇشىن 73 مىڭنان استام گرانت ءبولىنىپ وتىر. گرانتتاردىڭ باسىم بولىگى "ينجەنەرلىك، وڭدەۋ، قۇرىلىس سالالارى" ءبىلىم بەرۋ باعدارلاما توپتارىنا بولىنگەن، ولاردىڭ سانى 17 794 گرانتتى قۇرايدى. ال "پەداگوگيكالىق عىلىمدارعا" – 10 810 گرانت، "اقپاراتتىق-كوممۋنيكاسيالىق تەحنولوگيالار" سالاسىنا – 9 103 گرانت، "جاراتىلىستانۋ عىلىمدارى، ماتەماتيكا جانە ستاتيستيكا" باعىتىنا – 6 288 گرانت تيەسىلى. وسىلايشا، تەحنيكالىق باعىتتار بويىنشا مەملەكەتتىك تاپسىرىستىڭ ۇلەسى 60%-عا دەيىن ۇلعايعان.
ۇبت قورىتىندىسى بويىنشا كەمىندە 65 بالل جيناعان تالاپكەرلەر ۇلتتىق جوعارى وقۋ ورىندارىنا، كەمىندە 50 بالمەن باسقا جوعارى وقۋ ورىندارىنا تۇسە الادى. بۇل رەتتە "پەداگوگيكالىق عىلىمدار" جانە "قۇقىق" ءبىلىم بەرۋ سالالارى بويىنشا شەكتى بالل كەمىندە 75 بالل، "دەنساۋلىق ساقتاۋ" − كەمىندە 70 بالل، "اۋىل شارۋاشىلىعى جانە بيورەسۋرستار"، "ۆەتەريناريا" – كەمىندە 60 بالدى قۇرايدى.
وقۋعا تۇسۋشىلەر 16 مامىر مەن 5 شىلدە ارالىعىندا وتكەن ۇبت-نىڭ ەكى ناتيجەسىنىڭ بىرەۋىن كونكۋرسقا ۇسىنا الادى.
مەملەكەتتىك ءبىلىم بەرۋ گرانتتارىن تاعايىنداۋ كونكۋرسىنا قاتىسۋعا قۇجاتتاردى ەلەكتروندى تۇردە تاپسىرۋ ءۇشىن تالاپكەرلەرگە تومەندەگى قۇجاتتار قاجەت:
- جەكە كۋالىك؛
- ۇبت سەرتيفيكاتى؛
- 3ح4 كولەمىندەگى فوتو؛
- ورتا ءبىلىم تۋرالى اتتەستات (تەحنيكالىق جانە كاسىپتىك ءبىلىم بەرۋ (تجكب) ۇيىمدارىنىڭ تۇلەكتەرى ءۇشىن ديپلوم)؛
- № 075/ۋ نىسانىنداعى مەديسينالىق انىقتاما جانە № 063/ۋ نىسانىنداعى پروفيلاكتيكالىق ەكپەلەر كارتاسى؛
- ەر جىگىتتەر ءۇشىن اسكەري تىركەلۋ كۋالىگى؛
- جەڭىلدەتىلگەن سانات بويىنشا كونكۋرسقا قاتىسۋ ءۇشىن راستايتىن قۇجاتتار.
ەگەر تالاپكەر "التىن بەلگى" يەگەرى نەمەسە وتانسۇيگىشتىك جانە بەلسەندى ازاماتتىق ۇستانىمى ءۇشىن ەرەكشەلىك بەلگىسىمەن ماراپاتتالعان بولسا، وندا ول باسقا ۇمىتكەرلەرمەن بالدارى تەڭ بولعان جاعدايدا باسىم قۇقىققا يە بولادى. وليمپيادالار مەن سپورتتىق جارىستاردىڭ جەڭىمپازدارى ءۇشىن دە وسىنداي باسىمدىلىق قاراستىرىلعان.
بيىل العاش رەت حالىق تىعىز ورنالاسقان جانە باتىس وڭىرلەرىنىڭ جاستارىنىڭ جەتەكشى جوعارى وقۋ ورىندارىندا وقۋعا ارنالعان ماقساتتى ءبىلىم بەرۋ گرانتى باعدارلاماسى ىسكە قوسىلىپ وتىر. بۇل اتىراۋ جانە ماڭعىستاۋ وبلىستارىنىڭ 10 مىڭ تالاپكەرىنە جوعارى وقۋ ورىندارىندا ءبىلىم الۋ ءۇشىن ماقساتتى گرانتتار الۋعا مۇمكىندىك بەرەدى.
سونىمەن قاتار بيىل حالىقتىڭ الەۋمەتتىك وسال توپتارىنا بولىنەتىن گرانتتار سانى كوبەيتىلگەن. كامەلەتكە تولماعان ءتورت جانە ودان كوپ بالا تاربيەلەپ وتىرعان وتباسىلارداعى بالالار ءۇشىن گرانتتاردىڭ جالپى سانىنىڭ 5%-ى، كەمىندە ءۇش جىل تولىق ەمەس وتباسى مارتەبەسى بار وتباسىلاردان شىققان بالالارعا – 1%، ءى، ءىى توپتاعى مۇگەدەك بالالاردى تاربيەلەپ وتىرعان وتباسىلاردان شىققان تۇلەكتەرگە ءبىلىم بەرۋ گرانتتارىنىڭ 1%-ى كوزدەلگەن. جەتىم بالالار جانە اتا-اناسىنىڭ قامقورلىعىنسىز قالعان بالالار مەن I، II توپتاعى مۇگەدەكتەر، بالا كەزىنەن مۇگەدەكتەر، مۇگەدەك بالالار اراسىنان شىققان ازاماتتار ءۇشىن كۆوتا گرانتتار سانىنىڭ 1%-ىن قۇرايدى. جىل سايىن قازاقستان رەسپۋبليكاسىنىڭ ازاماتى بولىپ تابىلمايتىن ۇلتى قازاق ادامدارعا (قانداستارعا) گرانتتاردىڭ 4%-ى بەرىلەدى.
ءبىلىم بەرۋ گرانتتارىن تاعايىنداۋ كونكۋرسىنا قاتىسۋعا قۇجات قابىلداۋ 20 شىلدەگە دەيىن جالعاسادى.
پىكىر قالدىرۋ