سوت كەنتاۋ قالاسىنىڭ بۇرىنعى اكىمىن پارا العانى ءۇشىن كىنالى دەپ تانىپ، 10 جىلعا باس بوستاندىعىنان ايىردى، دەپ جازادى Tengrinews.kz سايتى.

الماتىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا كەنتاۋ قالاسىنىڭ ەكس-اكىمى داۋرەن ماحاجانوۆقا قاتىستى ۇكىم شىقتى. ول قىلمىستىق كودەكستىڭ 366-بابى 4-بولىگى "اسا ءىرى مولشەردە پارا الۋ" بويىنشا قىلمىس جاساعانى ءۇشىن كىنالى دەپ تانىلدى.

"سوت داۋرەن ءسابيت ۇلى ماحاجانوۆتى 24-باپتىڭ 7-بولىگى ("قىلمىسقا دايىندالۋ جانە قىلمىس جاساۋعا وقتالۋ") جانە ق ر قك-نىڭ 366-بابى 4-بولىگى بويىنشا قىلمىستىق قۇقىق بۇزۋشىلىق جاساعانى ءۇشىن كىنالى دەپ تانۋعا ۇكىم شىعاردى.  مەملەكەتتىك قىزمەتتە، سوتتا، ۇلتتىق بانكتە، ۆەدومستۆولاردا، قارجى نارىعى مەن قارجى ۇيىمدارىن رەتتەۋ جانە باقىلاۋ ورگاندارىندا، مەملەكەتتىك ۇيىمدا جانە كۆازيمەملەكەتتىك سەكتور سۋبەكتىلەرىندە قىزمەت اتقارۋعا ءومىر بويىنا تىيىم سالۋ جانە ون جىل مەرزىمگە باس بوستاندىعىنان ايىرۋ تۇرىندەگى جازا تاعايىندالسىن. جازانى وتەۋ ورنى قىلمىستىق-اتقارۋ جۇيەسىنىڭ بارىنشا ءقاۋىپسىز مەكەمەلەرى بولىپ تاعايىندالادى. مەرزىم سوت ۇكىمى زاڭدى كۇشىنە ەنگەن ساتتەن باستاپ ەسەپتەلەدى. 2022 جىلدىڭ 24 اقپانىنان باستاپ قاماۋعا الۋ مەرزىمى جازا مەرزىمىنە ەسەپتەلسىن"، - دەگەن ۇكىم شىعاردى الماتى قالاسى قىلمىستىق ىستەر جونىندەگى مامانداندىرىلعان اۋدانارالىق سوتىنىڭ سۋدياسى مارتپەك كاكىمجانوۆ.

ءىىس بويىنشا باسقا ايىپتالۋشىلار – لاۆرەنتيي بوبرىشيەۆ پەن باۋىرجان تۇمەبايەۆ 368-باپتىڭ 1-بولىگى "پارا الۋداعى مەدياسيا" بويىنشا كىنالى دەپ تانىلدى. بوبرىشيەۆ ءبىر جىلعا باس بوستاندىعىنان ايىرىلدى. جازاسىن ەڭ تومەنگى قاۋىپسىزدىك مەكەمەسىندە وتەيدى. باۋىرجان تۇمەبايەۆ ءبىر جىل التى ايعا باس بوستاندىعىنان ايىرىلعان.

سوتتالۋشىلاردان پروسەسسۋالدىق شىعىن رەتىندە 171 000 تەڭگە ءوندىرىلدى. سونداي-اق، ماحاجانوۆتان جابىرلەنۋشىلەرگە وتەماقى قورىنا 30 اەك (شامامەن 91 مىڭ تەڭگە) كولەمىندە تولەماقى ءوندىرىلدى. بوبرىشيەۆ پەن تۇمەبايەۆتىڭ ءارقايسىنان 15 اەك (شامامەن 45 000 تەڭگە) كولەمىندە ءوندىرىلدى.

سوت ۇكىمىنە 15 كۇن ىشىندە شاعىم جاساۋعا بولاتىنى ايتىلدى.