رەسەي تەرگەۋ كوميتەتى وپپوزيسيونەر، ماسكەۋدىڭ كراسنوسەلسك اۋدانى مۋنيسيپاليتەتىنىڭ دەپۋتاتى يليا ياشينگە رەسەي قارۋلى كۇشتەرى تۋرالى كورىنەۋ جالعان اقپارات تاراتتى دەپ ايىپ تاقتى. بۇل تۋرالى "ينتەرفاكس" اقپارات اگەنتتىگىنە ادۆوكات ۆاديم پروحوروۆ ءمالىم ەتكەن.
"يليا ياشينگە قىلمىستىق كودەكستىڭ 207،3-بابى 2-بولىگى "د" پۋنكتىندە كوزدەلگەن رف قارۋلى كۇشتەرى تۋرالى كورىنەۋ جالعان اقپارات تاراتتى دەگەن ايىپ تاعىلدى" دەيدى پروحوروۆ.
ماسكەۋ باسمان سوتى ياشينگە قاتىستى بۇلتارتپاۋ شاراسىن بۇگىن كەشكە تاعايىنداماق.
قىلمىستىق ءىس ءياشيننىڭ 7 ءساۋىر كۇنى جۋرناليست يۋريي دۋدكە بەرگەن سۇحباتىندا ۋكرايناداعى بۋچا قالاسىندا بولعان جاعداي تۋرالى ايتقان سوزدەرىنە بايلانىستى قوزعالعان.
اتالعان باپ بويىنشا كۇدىكتى 10 جىلعا دەيىن باس بوستاندىعىنان ايىرىلۋى مۇمكىن.
كەشە ءياشيننىڭ ماسكەۋدەگى پاتەرىن تىنتىگەن. بۇعان دەيىن ياشين پوليسەيگە باعىنبادى دەگەن ايىپپەن 15 تاۋلىككە قاماۋدا بولعان.
پىكىر قالدىرۋ